तात्या लांडगे

सोलापूर : जिल्हा परिषदेसह खासगी प्राथमिक व माध्यमिक शाळांची उद्यापासून (शनिवार) अंतिम सत्राची परीक्षा सुरू होत आहे. २२ एप्रिलनंतर शाळांना उन्हाळी सुट्टी असणार आहे. सुट्टीत अनेकजण मामाच्या गावाला किंवा फिरायला परगावी जातात. अशावेळी बंद घरांवर वॉच ठेवून असलेले चोरटे घरातील दागिने, रोकड लंपास करतात. त्यामुळे पोलिसांनी तर गस्त वाढविण्याचे नियोजन केलेच आहे, पण प्रत्येक नागरिकाने बंद घरात मौल्यवान वस्तू ठेवू नयेत. दागिने, रोकड बॅंकेच्या लॉकरमध्ये सुरक्षित ठेवावेत, घरासमोर सीसीटीव्ही कॅमेरे बसवावेत, असे आवाहन पोलिसांनी केले आहे.

सोलापूर शहरात सात पोलिस ठाणी असून, शहर गुन्हे शाखेने उन्हाळी सुट्टीच्या पार्श्वभूमीवर रात्रगस्तीचे स्वतंत्र नियोजन (वेळापत्रक) तयार केले आहे. प्रत्येक पोलिस ठाण्यातील गुन्हे प्रकटीकरण पथक रात्रगस्त घालेल. रात्री १० नंतर शहरात येणाऱ्या रस्त्यांवर, शहरांतर्गत काही परिसरात नाकाबंदी देखील लावली जाणार आहे. नागरिकांनी उकाड्यामुळे घराबाहेर झोपताना घराला बाहेरून कुलूप लावावे, घराच्या छतावर झोपायला जाताना आतून घर नीट बंद केल्याची खात्री करावी. ग्रामीणमध्ये शेतकऱ्यांनी त्यांची जनावरे सांभाळावीत. अडचणीच्या वेळी नागरिकांना ‘११२’वर कॉल करून पोलिसांची मदत घेता येईल. अवघ्या १० मिनिटांत पोलिस घटनास्थळी पोचतील, असेही अधिकाऱ्यांनी सांगितले.

उन्हाळी सुट्टीत परगावी जाताना...

• घरात मौल्यवान वस्तू ठेवू नका, दागिने, रोकड बॅंकेत राहील सुरक्षित

• घराला बसवा सेफ्टी डोअर, घरासमोर लावा काही हजार रुपयांचा सीसीटीव्ही कॅमेरा

• परगावी जाताना शेजारच्यांना लक्ष ठेवायला आवर्जून सांगा, सुरक्षारक्षक ठेवा

रेकॉर्डवरील आरोपींवरही राहणार लक्ष

उन्हाळी सुट्टीत शहरातील अनेकजण परगावी फिरायला म्हणून जातात. या काळात घरफोडी, चोरीचे प्रमाण लक्षणीय असते. या पार्श्वभूमीवर आम्ही दिवसाबरोबरच रात्रगस्त देखील वाढविणार आहोत. रात्री प्रत्येक पोलिस ठाण्याच्या हद्दीत नाकाबंदी राहील. या काळात पाेलिसांच्या रेकॉर्डवरील प्रत्येक आरोपीवर विशेषत: चोरी, घरफोडीतील आरोपींवर देखील लक्ष राहणार आहे.

- डॉ. अश्विनी पाटील, पोलिस उपायुक्त, सोलापूर शहर

परगावी जाताना घरात मौल्यवान वस्तू नको

उन्हाळी सुट्टीच्या पार्श्वभूमीवर ग्रामीणमधील २५ पोलिस ठाण्यांच्या हद्दीत दररोज रात्रगस्त, नाकाबंदी सुरू राहील. ‘लॉ इन्फोर्समेंट’ ॲपद्वारे पोलिसांच्या रात्रगस्तीची माहिती वरिष्ठ अधिकाऱ्यांना समजते. नागरिकांनी शेतात, अंगणात बांधलेल्या जनावरांकडे लक्ष ठेवावे. परगावी जाताना घरात मौल्यवान वस्तू ठेवू नयेत. उकाड्यामुळे घराबाहेर झोपताना घराला कुलूप लावावे.

- प्रीतम यावलकर, अपर पोलिस अधीक्षक, सोलापूर ग्रामीण