मुंबईः अजित पवारांमुळेच सुप्रिया सुळे निवडून येतात, असं विधान आमदार अमोल मिटकरी यांनी केलं होतं. त्यानंतर सुप्रिया सुळे यांनी संताप व्यक्त केला होता. अमोल मिटकरी यांना या प्रकरणात माफी मागावी लागली.

अमोल मिटकरी म्हणाले होते की, सुप्रिया सुळेंनी भाषणात अजितदादांसारखा भाऊ पाठिशी खंबीरपणे उभा असल्याचं म्हटलं.. मी त्यांचं शंभर टक्के समर्थन करतो. त्यांना निवडून आणण्यासाठी अजित पवारांसारखा भाऊ तन-मन-धनाने काम करतो. म्हणून त्या निवडून येतात.

अमोल मिटकरी यांच्या या विधानानंतर सुप्रिया सुळेंनी संताप व्यक्त केला होता. ''आम्ही नेहमीच तन आणि मनाने लढाई लढली. परंतु कधीही धनाचं राजकारण केलं नाही. अमोल मिटकरी यांचा याबाबत गैरसमज झाला असेल की, आम्ही धनाने निवडणुका जिंकतो.'' अजित पवार आणि मी कधीही पैशांनी निवडणुका जिंकल्या नाहीत, असं सुळेंनी म्हटल्यानंतर अमोल मिटकरींनी माफी मागितली आहे.

मिटकरी म्हणाले की, धन या शब्दामुळे सुप्रियाताईंना वाईट वाटलं असेल. परंतु आपण सहज बोलताना तन-मन-धन असा शब्दप्रयोग करतो. तसंच मी बोललो आहे. त्यांचा गैरसमज झाला आहे.. एक भाऊ म्हणून मी सुप्रिया सुळेंची माफी मागतो, असं मिटकरी म्हणाले.