मराठी चित्रपट सृष्टीतील ज्येष्ठ अभिनेते रमेश देव (Ramesh Deo) यांचे निधन झाले आहे. हृदय विकाराच्या झटक्याने त्यांचे निधन झाल्याची माहिती रमेश देव यांचा मुलगा आणि अभिनेते अजिंक्य देव यांनी दिली आहे. रमेश देव यांच्या निधनानंतर मराठी सिनेसृष्टीतील तसेच राजकीय क्षेत्रातील दिग्गजांनी त्यांच्या प्रतिक्रिया दिल्या आहेत.

दरम्यान राष्ट्रवादी कॉंग्रेसच्या नेत्या खासदार सुप्रिया सुळे यांनी ट्विट करत दुखः व्यक्त केले असून श्रद्धांजली वाहीली आहे. त्यांनी ट्विट केले आहे की, 'प्रख्यात अभिनेते, निर्माते आणि दिग्दर्शक रमेश देव यांचे निधन झाल्याची बातमी दुःखद आहे. सुमारे २८५ चित्रपटातून त्यांनी भूमिका साकारल्या. याशिवाय रंगभूमीवरही त्यांनी अजरामर भूमिका साकारल्या.' त्यांनी देव यांच्या निधनाबद्दल दुखः व्यक्त करत पुढे लिहिले की, 'त्यांच्या निधनामुळे कलाक्षेत्रात जिंदादिल मुशाफिरी करणारे एक जुने-जाणते व्यक्तिमत्त्व काळाच्या पडद्याआड गेले. त्यांना भावपूर्ण श्रद्धांजली.'