शिवसेना आमदार संजय शिरसाट आणि ठाकरे गटाच्या उपनेत्या सुषमा अंधारे यांच्यामध्ये सध्या चांगलाच संघर्ष पहायला मिळतो आहे. शिरसाट यांनी नुकतीच पत्रकार परिषद घेत सुषमा अंधारेंवर सडकून टीका केली होती. तसेच त्यांना इशारा देताना "आमदारकी उडत गेली, धडा शिकवल्याशिवाय राहणार नाही" असा इशारा दिला होता. त्यांच्या या इशाऱ्याला आता अंधारे यांनी प्रत्युतर देताना गुवाहाटी प्रकरणाचा उल्लेख करत त्यांना प्रत्युत्तर दिलं.

"आमदारकीचा राजीनामा देईन, सत्ता त्यागेन असं म्हणणं जर इतकं सोपं असतं तर या लोकांनी सूरत, गुवाहाटी हा प्रवासच केला नसता. त्यामुळं नैतिकतेच्या गप्पा यांच्या तोंडी शोभत नाही. मी अबला नारी नाही किंवा मी सहानुभुतीचं राजकारण करणार नाही. पण वारंवार महिलांबाबत बेतालं विधानं ही फक्त शिंदे गटाकडूनच होत आहेत" अशा शब्दांत अंधारे यांनी शिरसाटांना प्रत्युत्तर दिलं आहे.

"मला कमाल वाटते की, हे शिवरायांचे, बाळासाहेबांचे वारसदार किंवा फॉलोवर्स असूच शकत नाहीत. अब्दुल सत्तारांची, गुलाब पाटलांची भाषा आपण ऐकली होती आता संजय शिरसाट यांची भाषा आपण ऐकली. शिरसाटांच्या भाषेचं आणि अहंकारांचं मला अजूनही कौतुक वाटतंय कारण त्यांची पत्रकार परिषदेतील भाषा ही त्यांच्या संस्कारांचा परिचय देणारी होती. या संस्कारांचा परिचय देताना त्यांनी आज पुन्हा माझा बाप वैगरे काढलं"

या सगळ्या प्रकरणात मला पोलिसांनी सांगितलं की, "आम्ही गुन्हा नोंदवून घेऊ शकत नाहीत. हे प्रकरण कायद्याच्या व्याख्येत बसत नाही. याचा अर्थ संजय शिरसाट उत्तम प्रकारे कायद्याचं सल्ला घेऊन महिलांचे वाभाडे काढण्याचं मिशन हातात घेतलं आहे, असा गंभीर आरोपही यावेळी अंधारे यांनी केला.