मुंबई : शिवसेनेतून मुख्यमंत्री एकनाथ शिंदे (Eknath Shinde) यांच्या गटानं बंड केल्यामुळं शिवसेनेला मोठ्या प्रमाणात गळती लागली. ती अजूनही सुरूच आहे. आता शिवसेनेचे बंडखोर आमदार तानाजी सावंत (Tanaji Sawant) यांची शिवसेनेच्या सोलापूर जिल्हा संपर्क पदावरुन हकालपट्टी करण्यात आल्याची माहिती आहे.

शिवसेनेचे बंडखोर आमदार तानाजी सावंत यांची शिवसेनेच्या सोलापूर जिल्हा संपर्क पदावरुन हकालपट्टी करण्यात आलीय. त्यांच्या जागी आता सोलापूर जिल्हा संपर्क पदावर अनिल कोकीळ (Anil Kokil) यांची नियुक्ती करण्यात आलीय. सावंत यांची हकालपट्टी आणि अनिल कोकीळ यांची नियुक्ती पक्षप्रमुख उद्धव ठाकरे (Uddhav Thackeray) यांच्या आदेशानं करण्यात आल्याची माहिती सामनातून देण्यात आलीय.

अर्जुन खोतकरांची शिवसेना उपनेतेपदी निवड

एक दिवसापूर्वी शिवसेना पक्षप्रमुख उद्धव ठाकरे यांच्या आदेशानं अर्जुन खोतकर (Arjun Khotkar) यांची शिवसेनेच्या उपनेतेपदी नियुक्ती करण्यात आलीय. अशी माहिती एका पत्रकाद्वारे जाहीर करण्यात आलीय. त्याचबरोबर विजय नाहटा आणि विजय चौगुले यांची हकालपट्टी करण्यात आल्याचं माहिती पत्रकात देण्यात आलीय. त्यामुळं येणाऱ्या काळात शिवसेनेत अनेक नेत्यांची वरिष्ठ रिक्त पदे भरली जाणार आहेत.