बिनधास्त बोलण्यासाठी राज्यात ओळखले जाणारे आरोग्यमंत्री तथा धाराशिव जिल्ह्याचे पालकमंत्री डॉ. तानाजी सावंत यांच्या जुन्या वादग्रस्त भाषणाचे व्हिडिओ समाज माध्यमावर पोस्ट होत असल्याने निवडणुकीच्या आधीच राजकीय वातावरण ढवळून निघाले आहे. कधी विरोधकांच्या फायद्याचे तर कधी महायुतीत तणावाचे वातावरण निर्माण होत आहे.

आज उपमुख्यमंत्री अजित पवार यांच्यावर टीका करणारा सावंत यांचा वादग्रस्त व्हिडिओ सोशल मीडियात व्हायरल होत आहे.

'काँग्रेस आणि राष्ट्रवादी काँग्रेससोबत माझे कधीही जमले नाही. आज जरी मंत्रिमंडळात बैठकीला मांडीला मांडी लावून बसलो तरी उलटी आल्यासारखे होते', असे या व्हिडिओत सावंत म्हणत असल्याचे दिसत आहे.

भूम-परंडा विधानसभा मतदारसंघातील विरोधकांवर सडकून टीका करणाऱ्या पालकमंत्री डॉ. सावंत यांनी यापूर्वी राष्ट्रवादी काँग्रेसचे ज्येष्ठ नेते शरद पवार, शिवसेनेचे माजी मुख्यमंत्री उद्धव ठाकरे यांच्यावर अनेक वेळा टीका केली आहे. धरण फुटण्याचे कारण देताना केलेले वक्तव्य त्यांना त्रासदायक ठरत आहे.

यातच महायुतीत सहभागी झालेल्या राष्ट्रवादी काँग्रेसवर डॉ. सावंत यांनी एका कार्यक्रमात केलेली टीका गुरुवारी (ता. २९) समाज माध्यमावर आल्याने राजकीय वातावरण ढवळून निघाले आहे. मात्र, असे समाज माध्यमावर येणारे व्हिडिओ कोणत्या गावचे आहेत? कोणत्या कार्यक्रमातील आहेत ? कधीचे आहेत? हे मात्र अनेक वेळा कळत नसल्याने समाज माध्यमातून संभ्रमाचे वातावरण निर्माण होत आहे.

यापुढेही डॉ. सावंत यांचे असेच वादग्रस्त जुने व्हिडिओ पुन्हा येऊन राज्याचे राजकारण ढवळून निघण्याची शक्यता आहे.

धाराशिव शिवसेनेचे समन्वयक गौतम लटके म्हणाले, "मतदारसंघातील विकासकामांची धास्ती विरोधकांनी घेतली आहे. त्यांच्याकडे बोलण्यासारखे काहीही नसल्यामुळे असे व्हिडिओ विरोधकांकडून व्हायरल केले जात आहेत. आणि त्यातून संभ्रमाचे वातावरण निर्माण होत आहे. मतदारसंघातील जनतेचा डॉ. सावंत यांच्यावर विश्वास आहे."