सोलापूर : जिल्हांतर्गत बदलीत संवर्ग एकमधून बदली झालेल्या ४३ शिक्षकांसह त्यांच्या नातेवाइकांची मुंबईच्या जे. जे. रुग्णालयाकडून वैद्यकीय फेरतपासणी होणार आहे. जिल्हा परिषदेचे मुख्य कार्यकारी अधिकारी कुलदीप जंगम यांनी शनिवारी (ता. २६) याबाबतचा आदेश काढला आहे. तसे पत्र जे. जे. रुग्णालयाला दिले आहे.

जिल्हांतर्गत बदलीत संवर्ग एकमधून सोयीच्या ठिकाणी बदली मिळवण्यासाठी अनेक प्राथमिक शिक्षकांनी आजारी व दिव्यांग असल्याचे बोगस वैद्यकीय प्रमाणपत्र मिळविले आहे, अशी तक्रार बार्शी तालुका प्राथमिक शिक्षक संघटना समन्वय समितीने जिल्हा परिषदेच्या मुख्य कार्यकारी अधिकाऱ्यांकडे केली होती. त्यानुसार मुख्य कार्यकारी अधिकारी जंगम यांनी मुंबईच्या जे. जे. रुग्णालयाशी पत्रव्यवहार केला होता. मात्र, त्या रुग्णालयाने सरकारी निर्णयाचा संदर्भ देत स्थानिक सरकारी रुग्णालयाकडून वैद्यकीय फेरतपासणी करून घेण्याविषयी कळवले होते. त्यानुसार येथील 'सिव्हिल हॉस्पिटल'मधून वैद्यकीय फेरतपासणी करण्यात आली. त्यात गैरप्रकार झाल्याचा आरोप करीत शिक्षक संजय पाटील, अनिल देशपांडे यांनी मुख्य कार्यकारी अधिकारी जंगम यांच्याकडे पुन्हा तक्रार केली होती.

तर वैद्यकीय फेरतपासणीबाबत साशंकता असल्यास जे. जे. रुग्णालयाकडून पुन्हा वैद्यकीय तपासणी करून घ्यावी, असे अधिष्ठाता डॉ. संजीव ठाकूर यांनी स्पष्ट केले होते. तक्रारीवर मुख्य कार्यकारी अधिकारी जंगम यांनी सुनावणी घेतली होती. त्यात योग्य कार्यवाही करण्याचे आश्‍वासनही त्यांनी दिले होते. त्यानुसार ४३ शिक्षकांसह त्यांच्या नातेवाइकांची पुन्हा वैद्यकीय तपासणी करावी, असा पत्रव्यवहार त्यांनी जे. जे. रुग्णालयाशी केला आहे.

फेरतपासणीनंतर होणार कारवाई

संवर्ग एकमधून बदली प्रक्रिया समुपदेशनाने पूर्ण झाली आहे. त्यातील ४३ शिक्षकांच्या वैद्यकीय प्रमाणपत्राबाबत तक्रारदारांनी साशंकता व्यक्त करत आव्हान दिले होते. यात शिक्षकांसह त्यांच्या पत्नी, पाल्यांच्या वैद्यकीय प्रमाणपत्रांचा समावेश आहे. जे. जे. रुग्णालयाच्या वैद्यकीय फेरतपासणीत एखाद्या शिक्षकाने सादर केलेले वैद्यकीय प्रमाणपत्र बोगस असल्याचे आढळल्यास त्यावर कारवाई होऊ शकते.

संवर्ग- एकमधून शिक्षक बदलीची आकडेवारी

• अर्ज केलेले : ६८८

• नकार दिलेले : ३४

• बदली झालेले : ६५४

• मराठी माध्यम : ६२६

• कन्नड माध्यम : १७

• उर्दू माध्यम : ११