राज्यातील कृषी उत्पन्न बाजार समितीचे निकाल जाहीर झाले आहेत. 147 बाजार समित्यांच्या जागांसाठी शुक्रवारी निवडणूक पार पडली होती. निवडणुकीचा शनिवारी निकाल जाहीर झाला आहे. या निवडणुकीत धक्का बसलेल्यांमध्ये सत्ताधारी पक्षातील आमदार, खासदार आणि मंत्र्यांचा समावेश आहे.

तर शिवसेना-भाजपला शेतकऱ्यांनी नाकारल्याचे चित्र पाहिला मिळत आहे. या निवडणुकीत महाविकास आघाडीचा सर्वात जास्त बाजार समित्यांवर झेंडा फडकला आहे. याच पार्श्वभूमीवर ठाकरे गटाचे खासदार संजय राऊत यांनी ट्विट करत निकालावर प्रतिक्रिया दिली.

त्यांनी ट्विटमध्ये लिहिलं आहे की, "बाजार समिती निवडणुकीत शिवसेनेसह महविकास आघाडीस उत्तम यश मिळाले. गद्दार आमदारांचा शेतकरी मतदारांनी करेक्ट कार्यक्रम केलं.हेच महाराष्ट्राचे जनमानस आहे. ही सुरुवात आहे.. महानगर पालिका, विधानसभा, लोकसभा निवडणुकीत असाच जोरदार कार्यक्रम होईल.लोकांनी खोके लाथाडले .हे स्पष्ट दिसते. हिम्मत असेल तर महानगर पालिका निवडणुका घेऊन दाखवा!"

दरम्यान राज्यात शिवसेनेतून बंडखोरी केलेल्या आमदारांना मंत्र्यांना जबर धक्का बसला आहे. यात नाशिकचे पालकमंत्री दादा भुसे यांना होम पीचवरच मोठा धक्क बसला आहे. मालेगाव कृषी उत्पन्न बाजार समितीच्या निवडणुकीत उध्दव ठाकरे गटाचे उपनेते अद्वय हिरे यांच्या नेतृत्वाखालील महाविकास आघाडीने बाजार समितीवर सत्ता मिळवली आहे.

या निवडणुकीत सोसायटी गटातून अकरा पैकी दहा जागांवर दणदणीत विजय मिळवला आहे. त्यामुळे पालकमंत्री दादा भुसे यांना मोठा झटका बसला आहे. तर आरोग्य मंत्री तानाजी सावंत यांना देखील जबर धक्का बसला आहे. तसेच मंत्री संजय राठोड अशा अनेक दिग्गज मंत्र्यांना शेतकऱ्यांनी नाकारले आहे.