सोलापूर : इयत्ता दहावीच्या विद्यार्थ्यांचा बोर्ड परीक्षेचा निकाल उद्या (मंगळवारी) जाहीर होणार आहे. सोलापूर जिल्ह्यातील ६५ हजार ५८५ विद्यार्थ्यांची उत्सुकता शिगेला पोचली आहे. ‘बेस्ट ऑफ फाइव्ह’ पद्धतीमुळे विद्यार्थ्यांना मिळालेल्या गुणांची टक्केवारी अधिक असणार आहे. निकालानंतर सोमवारपासून (ता. १९) अकरावीच्या प्रवेशाला सुरवात होणार आहे.

यंदा दहावीच्या विद्यार्थ्यांची परीक्षा नेहमीपेक्षा १० दिवस आधी सुरू झाली होती. त्यानुसार निकाल देखील यंदा लवकरच जाहीर झाला आहे. महाराष्ट्र राज्य माध्यमिक व उच्च माध्यमिक शिक्षण मंडळाद्वारे जाहीर होणारा दहावीचा निकाल विद्यार्थ्यांना https://mahresult.nic.in/, http://www.sscresult.mkcl.org आणि https://sscresult.mahahsscboard.in या संकेतस्थळांवर पाहता येणार आहे. दोन दिवसांनी विद्यार्थ्यांना त्यांच्या शाळांमधून गुणपत्रिका मिळतील. त्यानंतर अकरावीच्या प्रवेशाला सुरवात होणार आहे.

निकालानंतर विद्यार्थ्यांना प्रवेश अर्ज भरण्यासाठी १० ते १५ दिवसांचा अवधी दिला जाणार आहे. त्यानंतर पहिली तात्पुरती गुणवत्ता यादी जाहीर होईल. मुख्य तीन प्रवेश फेऱ्या आणि आवश्यकतेनुसार विशेष प्रवेश फेरी प्रसिद्ध केली जाणार आहे. सोलापूर जिल्ह्यात अकरावी प्रवेशासाठी २५ हजार ३०० पर्यंत विज्ञान शाखेच्या जागा आहेत. उर्वरित ३९ हजार जागा वाणिज्य व कला शाखेच्या आहेत.

अकरावी प्रवेशासाठी ‘या’ लिंकवर करा अर्ज

इयत्ता दहावीच्या निकालानंतर अकरावी प्रवेशाची प्रक्रिया १९ मेपासून सुरू होणार आहे. त्यासाठी विद्यार्थ्यांना https://mahafyjcadmissions.in/landing या अधिकृत लिंकवर अर्ज करता येणार आहे. त्याठिकाणी बहुतेक माहिती इंग्रजीत असून प्रत्येक प्रवेश फेरीच्या तारखा, प्रवेशासंदर्भातील माहितीपुस्तिका, प्रवेशाचे नियम, शाखानिहाय प्रवेश क्षमता, अशी माहिती देखील तेथे असणार आहेत. तसेच कॅप राउंड व खासगी कोट्यातील प्रवेश क्षमतेची आकडेवारी देखील ऑनलाइन पाहायला मिळेल. पसंतीक्रमानुसार विद्यार्थ्यास प्रत्येक प्रवेश फेरीवेळी कोणत्या शाखेच्या किती जागांवर प्रवेश झाले आणि किती प्रवेश शिल्लक आहेत हे समजणार आहे. प्रवेश अर्ज दोन भागात भरावा लागणार असून पहिल्या भागात वैयक्तिक माहिती आणि दुसऱ्या भागात महाविद्यालयांचे पसंतीक्रम टाकावे लागणार आहेत. एका विद्यार्थ्यास १० महाविद्यालयांची निवड करता येईल.