सोलापूर : नागरी विमान वाहतूक महासंचालनालयाकडून (डीजीसीए) विमानसेवा सुरू करण्याचा परवाना मिळेपर्यंत सोलापूरची विमानसेवा सुरू होणार नाही. त्यांच्याकडून परवाना मिळावा, यादृष्टीने विमानतळावर सध्या युद्धपातळीवर कामे सुरू आहेत. ही कामे जून-जुलैपर्यंत संपतील आणि त्यानंतर परवान्यासाठी त्यांच्याकडे प्रस्ताव जाईल. त्यांच्या परवानगीनंतर सोलापूर विमानतळावरून विमानसेवा सुरू होईल, अशी माहिती जिल्हाधिकारी कुमार आशीर्वाद यांनी ‘सकाळ’शी बोलताना दिली.
सोलापूर विमानतळ सुरू होण्यापूर्वी तेथील पाण्याचे कनेक्शन, धावपट्टी, संरक्षण भिंत, ड्रेनेज, प्रवासी टर्मिनल, प्रशासकीय इमारत, वाहनतळ अशी कामे युद्धपातळीवर सुरू आहेत. तसेच विमानतळाचे विस्तारीकरण करून दोन विमानांसाठी पार्किंगची व्यवस्था, अद्ययावत फायर फायटिंग स्टेशन, फ्लाईंग ट्रेनिंग सेंटर अशा बाबींचीही उभारणी होणार आहे.
सध्या संरक्षक भिंत, पाणी-ड्रेनेज लाइन व धावपट्टीची कामे सुरू असून, ती जून-जुलैपर्यंत पूर्ण होणार आहेत. त्यानंतर विमानसेवा सुरू करण्यासंदर्भातील हालचालींना गती येणार आहे. दरम्यान, विमानसेवा सुरू होण्यासंदर्भात सोलापूर विमानतळाचे व्यवस्थापक चॅंम्पला बानोत यांनीही जिल्हाधिकारी जे म्हणतात तसेच होणार आहे. विमानसेवा सुरू करण्यासाठी विशिष्ट निमयावली असते आणि त्याची परिपूर्ती झाल्याशिवाय सेवा सुरू होत नाही, असेही त्यांनी यावेळी स्पष्ट केले. विमानसेवा निश्चितपणे सुरू होणार आहे, पण कधीपासून हे सध्यातरी सांगता येत नाही, असेही ते म्हणाले.
डॉ. आडके म्हणाले ‘पीएमओ’ कार्यालयाकडून पत्र
प्रधानमंत्री कार्यालयाकडून सोलापूरचे होटगी रोड विमानतळ ३१ ऑगस्ट २०२४ पर्यंत कार्यान्वित होऊ शकते. तसेच ‘उडान’अंतर्गत अलायन्स एअर कंपनीची (ए. टी. आर- ७२) विमानसेवा सोलापूर- हैदराबाद अशी सुरू करता येऊ शकते, असे पत्र ‘पीएमओ’ कार्यालयाकडून प्राप्त झाल्याची माहिती सोलापूर विचार मंचचे डॉ. संदीप आडके यांनी दिली. सोलापूर दौऱ्यावेळी पंतप्रधान नरेंद्र मोदी यांनी सोलापूर विमानतळाचे उद्घाटन करण्यासंबंधीचे पत्र आपण पंतप्रधानांना लिहिले होते, असेही त्यांनी सांगितले.
परवाना मिळाल्यावरच सोलापूरची विमानसेवा
सध्या विमानतळावर सुरू असलेली महत्त्वाची कामे जून-जुलैपर्यंत पूर्ण होतील. त्यानंतर ‘डीजीसीए’कडून विमानसेवा सुरू करण्याचा परवाना लागेल. उपमुख्यमंत्री देवेंद्र फडणवीस यांचा त्यासाठी पाठपुरावा सुरू आहे. परवाना मिळण्यापूर्वी ‘डीजीसीए’सह राज्यातील महाराष्ट्र विमानसेवा विकास महामंडळाचे अधिकारी येवून सोलापूर विमानतळाची पाहणी करतील. त्यानंतर त्यांच्याकडून परवाना मिळेल आणि मग विमानसेवा सुरू होईल.
- कुमार आशीर्वाद, जिल्हाधिकारी, सोलापूर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.