सोलापूर : जिल्ह्यातील ९१ महसूल मंडळांपैकी ८१ मंडळांमध्ये १ जून ते ३१ ऑगस्ट या तीन महिन्यात तब्बल ६० ते ८० दिवस पाऊस पडलेला नाही. पंढरपूर, सांगोला, माळशिरस, मंगळवेढा या चार तालुक्यांमध्ये चिंताजनक स्थिती आहे. अक्षरश: बळीराजाच्या डोळ्यादेखत पाण्याअभावी पिके माना टाकत आहेत. या पार्श्वभूमीवर संपूर्ण जिल्हाच दुष्काळाच्या उंबरठ्यावर आहे.

सोलापूर शहर व जिल्ह्याची भिस्त उजनीवर अवलंबून आहे. पण, पावसाअभावी उजनी धरण सध्या १६ टक्क्यांपर्यंत पोचले आहे. दुसरीकडे जिल्ह्यात एकरुख, हिंगणी, मांगी, आष्टी, जवळगाव, बोरी, पिंपळगाव ढाळे या मध्यम प्रकल्पांमध्येही पाणी नाही. पावसाचा मोठा खंड पडल्याने खरीपात पेरलेली मका, भुईमूग, तीळ, कारळे, सोयाबीन, उडीद, मूग, तूर, मका, बाजरी, सुर्यफूल या पिकांना फुले सुद्धा आली नाहीत.

जिल्ह्यातील बहुतेक महसूल मंडळांमध्ये १ जूनपासून एकही मोठा समाधानकारक पाऊस झालेला नाही. त्यामुळे पेरणीचा खर्च देखील निघणार नाही, अशी चिंताजनक स्थिती आहे. दोन-तीन दिवसांत पिकांच्या नुकसानीचा सर्व्हे पूर्ण होऊन त्याचा अहवाल जिल्हाधिकाऱ्यांसह शासनाला पाठविला जाईल. पण, सद्य:स्थितीत ७५ ते ९० टक्क्यांपर्यंत नुकसान झाल्याचे चित्र आहे.

१ जूनपासून ६० दिवसांपेक्षा अधिक पावसाचा खंड

तालुका महसूल मंडळ

• उत्तर सोलापूर तिऱ्हे, वडाळा

• बार्शी बार्शी, आगळगाव, उपळे दुमाला, गौडगाव, खांडवी, पानगाव, पांगरी, नारी, सुर्डी

• अक्कलकोट अक्कलकोट, जेऊर, तडवळ, करजगी, मैंदर्गी, चपळगाव, किणी, दुधनी

• द. सोलापूर सोलापूर, वळसंग, मंद्रूप, होटगी, निंबर्गी, विंचूर

• मंगळवेढा बोराळे, मरवडे, आंधळगाव, मारापूर, मंगळवेढा, भोसे, हुलजंती

• सांगोला सांगोला, शिवणे, जवळा, हतीद, सोणंद, महूद, कोळा, नाझरा, संगेवाड

• माळशिरस माळशिरस, इस्लामपूर, सदाशिवनगर, दहिगाव, नातेपुते, अकलूज, लवंग, महाळूंग, वेळापूर, पिलीव

• करमाळा करमाळा, अर्जूननगर, केम, सोलसे, कोर्टी, उमरड, केतूर

• मोहोळ कामती, टाकळी, पेनूर, वाघोली, नरखेड, शेटफळ

• माढा माढा, दारफळ, कुर्डुवाडी, रोपळे, म्हैसगाव, टेंभुर्णी, मोडनिंब, लऊळ

• पंढरपूर पंढरपूर, भंडिशेगाव, भाळवणी, करकंब, पिराचीकुरोली, पुळुज, चळे, तुंगत, कासेगाव

उजनीची सद्य:स्थिती

• एकूण पाणीसाठा

• ७२.२३ टीएमसी

• उपयुक्त पाणीसाठा

• ८.५९ टीएमसी

• ‘उपयुक्त’ची टक्केवारी

• १६ टक्के

ठळक बाबी...

• - जिल्ह्यात यंदा खरीपाची तीन लाख ३५ हजार १०२ हेक्टरवर (११६ टक्के) पेरणी

• - जिल्ह्यात खरीपाचे दोन लाख ८९ हजार ५७० हेक्टर सरासरी क्षेत्र

• - पावसाअभावी तब्बल पावणेतीन लाख हेक्टरवरील पिके वाया गेल्याची स्थिती

• - जिल्हाधिकाऱ्यांच्या अधिसूचनेनंतर ३० दिवसांत पिकविमा कंपन्यांना भरपाई द्यावी लागणार