मुंबई : राज्यात लसीकरणाचा (corona vaccination) वेग वाढला असून ६६ टक्के नागरिक लसवंत झाले आहेत. राज्यातील ६ कोटी ८७ लाख ९ हजार २६७ नागरिकांचा दुसरा डोस (vaccination second dose) पूर्ण झाला आहे; तर १३ जिल्ह्यांत ६६ टक्क्यांहून अधिक लसीकरण झाले आहे. १८ जिल्ह्यांत ६६ टक्के ते ५० टक्क्यांच्या दरम्यान लसीकरण (vaccination drive) झाले आहे. मात्र राज्यातील चार जिल्हे असेही आहेत जिथे ५० टक्क्यांहून कमी लसीकरण झाल्याचे आकडेवारीवरून स्पष्ट होत आहे.

औरंगाबाद, अकोला, बीड आणि नंदूरबार या चार जिल्ह्यांमध्ये ५० टक्क्यांहून कमी लसीकरण झाले  आहे. या जिल्ह्यांत सरासरी ४५ ते ४७ टक्के लसीकरण झाले आहे. औरंगाबादमध्ये ४७.४८ टक्के, अकोल्यामध्ये ४७.०३ टक्के, बीडमध्ये ४७.४८ टक्के, तर नंदूरबार ४५.२७ टक्के एवढेच लसीकरण झाले आहे. यामुळे चिंता वाढली असून येथील लसीकरण वाढवण्यासाठी सर्वतोपरी प्रयत्न करण्यात येत असल्याचे आरोग्य विभागाकडून सांगण्यात आले. सध्या ग्रामीण भागातील रुग्णसंख्या वाढण्यास सुरुवात झाली आहे.

त्यामुळे दोन्ही डोस पूर्ण करून सुरक्षित व्हावे, असे वैद्यकीय तज्ज्ञांकडून आवाहन केले जात आहे. १०० टक्के पहिला डोस ६६ टक्क्यांहून अधिक लसीकरण झालेल्या जिल्ह्यात मुंबई, पुणे, नागपूरसारख्या शहरांसह भंडारा, चंद्रपूर, सांगली सातारा, गोंदिया, रायगड, वर्धा, रत्नागिरीसारखे १३ जिल्हे आहेत. या १३ जिल्ह्यातील मुंबई, पुणे आणि भंडारा या तीन जिल्ह्यांत १०० टक्के पहिला डोस पूर्ण झाला असून उर्वरित दहा जिल्हे ९४ ते ९९ टक्क्यांदरम्यान आहेत; तर राज्याच्या सरासरी दोन्ही लसीकरणाच्या ६६ टक्क्यांहून कमी असलेल्या १८ जिल्ह्यांत ७३ ते ४५ टक्के एवढे दोन्ही डोस देण्यात आले आहेत. दरम्यान, मुंबईतील ९३.८७ टक्के नागरिकांनी दोन्ही डोस घेतले आहेत.