त्र्यंबकेश्वर मंदिरातील प्रवेशद्वारावर घडलेल्या प्रकारावरुन सध्या राज्यात वातावरण चांगलचं तापलं आहे. दरम्यान आता या प्रकरणात आखाडा परिषदेने उडी घेतली आहे. वादामागील सत्य शोधण्यासाठी आखाडा परिषदेने समितीची स्थापना केली आहे. येत्या 1 जूनपर्यंत ही समिती आपला निर्णय देणार आहे.

मिळालेल्या माहितीनुसार, त्र्यंबकेश्वर वादामागील सत्य शोधण्यासाठी आखाडा परिषदेने समितीची स्थापना केली आहे. त्र्यंबकेश्वरच्या वेगवेगळ्या आखाड्यातील 12 साधू आणि महंतांची ही समिती असणार आहे. धूप दाखवण्याची परंपरा होती की नव्हती? त्र्यंबकेश्वर मंदिरात बळजबरीने घुसण्याचा प्रयत्न खरच झाला होता का? यामागील सत्य ही समिती शोधून काढणार आहे.

त्र्यंबकेश्वर प्रकरणातील नेमकं सत्य ही 12 जणांची समिती शोधणार असून येत्या 1 जूनला समिती आपला निर्णय देणार आहे. त्र्यंबकेश्वर मंदिरात धूप दाखवण्याची परंपरा नसल्याचे तसंच बळजबरीने घुसण्याचा प्रयत्न केल्याचे सिद्ध झाल्यास आखाडा परिषद कठोर निर्णय घेणार असल्याचे देखील सांगितले जात आहे.

नेमकं काय आहे प्रकरण?

त्र्यंबकेश्वर येथे 13 मे रोजी एका गटाकडून धार्मिक यात्रा काढण्यात आली होती. त्यावेळी काही जणांनी मंदिरात प्रवेश करण्याचा प्रयत्न केला होता. मात्र मंदिरातील पुरोहितांनी त्याला विरोध केला. मंदिरातील सुरक्षा रक्षकांनीही अडवल्याने काही काळ तणाव निर्माण झाला होता.

त्यानंतर या प्रकरणी पुरोहित संघाने त्र्यंबकेश्वर पोलीस ठाण्यात तक्रार दिली. पोलिसांनी यानंतर रविवारी शांतता समितीची बैठक बोलावत दोन्ही गटांना समज देऊन हा वाद मिटविण्याचा प्रयत्न केला. दुसरीकडे या प्रकाराचा हा व्हिडीओ व्हायरल झाल्यानंतर हे प्रकरण तापलं आहे.