पुणेः जालन्यात मराठा आंदोलकांवर लाठीचार्ज झाल्यानंतर आयपीएस अधिकारी तुषार दोशी यांना सक्तीच्या रजेवर पाठवण्यात आले होते. तीन दिवसांपूर्वी त्यांची पुण्यात सीआयडीमध्ये बदली झाली होती. आता पुन्हा त्यांची बदली झालीय.

'एबीपी माझा'ने दिलेल्या वृत्तानुसार तुषार दोशी यांची रेल्वे पोलिस विभागात पोलिस अधीक्षक म्हणून बदली झाली आहे. लोहमार्ग एसपी म्हणून बदली झाल्याचं वृत्त आहे. अवघ्या तीनच दिवसांमध्ये दोशींची पुन्हा बदली झाल्याने आश्चर्य व्यक्त होतंय.

१ सप्टेंबर रोजी जालन्यातल्या आंतरवाली सराटी येथे पोलिसांनी मराठा आंदोलकांवर लाठीचार्ज केला होता. त्याचा व्हिडीओ व्हायरल झाल्यानंतर सरकारवर आरोप झाले. त्यानंतर जालन्याचे पोलिस अधीक्षक तुषार दोशी यांना सक्तीच्या रजेवर पाठवण्यात आले होते. तीन दिवसांपूर्वी त्यांची बदली झाली होती. त्यांच्याकडे पुणे सीआयडीचं अधीक्षकपद देण्यात आलेलं होतं.

दरम्यान, शिक्षणमंत्री दीपक केसरकर यांनी मुख्यमंत्र्यांना पत्र पाठवून तुषार दोशींच्या बदलीला स्थगिती द्यावी, अशी मागणी केली होती. मराठा आंदोलकांवरील लाठीहल्ल्याची जोपर्यंत चौकशी होत नाही तोपर्यंत दोशींना बदली देऊ नये, अशी मागणी त्यांनी केली होती.

मात्र दोशींनी सीआयडीचा पदभार घेण्यापूर्वीच त्यांनी तीनच दिवसांमध्ये बदली झाली आहे. सरकारमध्ये मराठा आरक्षणावरुन दोन गट पडल्याचं दिसून येत आहे. छगन भुजबळ जाहीरपणे सरकारवर नाराजी व्यक्त करत आहेत. तर दोशींच्या बदलीला दीपक केसरकर विरोध करत आहेत. त्यामुळे नेमकं चाललंय काय? असा प्रश्न उपस्थित होतोय.