Loksabha election 2024 : 2019च्या विधानसभा निवडणुकीपूर्वी उद्धव ठाकरेंनी भाजपच्या विरोधात विधानं केली होती. परंतु नंतर दोन्ही पक्षांमध्ये पॅचअप झालं. त्यावेळी अमित शाह 'मातोश्री'वर उद्धव ठाकरेंच्या भेटीसाठी दाखल झाले होते. माध्यमांशी बोलण्यापूर्वी उद्धव ठाकरे नेमकं काय म्हणाले होते, याची आठवण देवेंद्र फडणवीस यांनी सांगितली.

उपमुख्यमंत्री देवेंद्र फडणवीस म्हणाले की, उद्धव ठाकरेंनी अडीच वर्षे मुख्यमंत्रीपद मागितलं होतं. परंतु अमित शाहांनी त्याला नकार दिला होता. त्यामुळे आमच्यातली बोलणी थांबली होती. त्यानंतर तीन दिवसांनी उद्धव ठाकरेंनी मध्यस्थाला पाठवून चर्चेची तयारी दर्शवली होती.

''उद्धव ठाकरेंनी जास्तीची मंत्रिपदं, चांगली खाती आणि काही जागा मागितल्या होत्या. त्यावर चर्चा झाली.. सगळं ठरलं आणि त्यांनी अमित शाहांनी 'मातोश्री'वर यावं,अशी अट घातली. अमित शाहांनी नवीन कोणतेही इश्यू काढू नका, असं म्हणत येण्याची तयारी दर्शवली आणि ते आले.'' असा घटनाक्रम फडणवीसांनी सांगितला.

फडणवीस पुढे म्हणाले की, उद्धव ठाकरेंच्या मातोश्री निवासस्थानी अमित शाह आणि उद्धव ठाकरे यांच्यात बंद दाराआड चर्चा झाली. दोघांची सहमती झाली आणि मग मला बोलावलं. त्यानंतर होणाऱ्या पत्रकार परिषदेमध्ये काय बोलायचं, याची उजळणी माझ्याकडून करवून घेतली. पत्रकार परिषदेमध्ये मी एकट्यानेच भूमिका मांडली आणि प्रश्नोत्तरे झाली नाहीत.

या पत्रकार परिषदेपूर्वी उद्धव ठाकरे नेमकं काय म्हणाले होते, याची आठवण फडणवीसांनी सांगितली. ते म्हणाले की, उद्धव ठाकरे मला म्हटले, देवेंद्रजी मी भाजपविरोधात बोलले आहे. आता मला यू टर्न घ्यायचा आहे. त्यामुळे मला काही बोलता येणार नाही. परंतु आपल्याला काहीतरी मिळालंय, असं शिवसैनिकांना वाटलं पाहिजे, असं बोला. त्यानंतर पत्रकार परिषद झाली, असं फडणवीसांनी सांगितलं.