खेड - शिवसेना पक्षाचं नाव आणि चिन्ह एकनाथ शिंदे यांच्याकडे गेल्यानंतर माजी मुख्यमंत्री उद्धव ठाकरे यांनी पहिल्यांदाच जाहीर सभेला संबोधित केलं. यावेळी उद्धव ठाकरे भाजपच्या राष्ट्रवादावर जोरदार हल्लाबोल केला. तसेच भाजपच्या विविधी राज्यांतील युतीवरही टीका केली.

उद्धव ठाकरे म्हणाले, आमच्या घराणेशाहीवर टीका करतात. तुमचा आगापिछा काय आहे ते पाहा. तुमची मुलं-बाळ कोणत्याही कमिटीची अध्यक्ष करायची. आताच निवडणूक झाली. कसब्यात साफ झाले. बंडखरी नसती तर तिथही यांचा सुफडा साफ झाला असता. अंधेरीत लढायची तुमची हिंमत नव्हती.

इतर राज्यांमध्ये निवडणुका झाल्या. मेघालय येथे निवडणूक झाली. हे अमित शहा तिकडे गेले होते. तिथले मुख्यमंत्री कॉनरॉड संगमा यांच्यावर शहांनी भयानक आरोप केले होते. दोन कुटुंबांनीच गरीबांचा पैसा खालला. मेघालय देशातील भ्रष्ट राज्य आहे. तरी संगमांनी सत्ता मिळवली. त्यानंतर मोदींनी ट्विट करून म्हणतात, की आपण दोघं मिळून सरकार स्थापन करू. ज्यांच्यावर आरोप केले, त्यांच्याच बरोबर गोंडा घोळतातय, असं उद्धव म्हणाले.

अमित शहा पुण्यात येऊन म्हणतात, उद्धव ठाकरेंनी राष्ट्रवादीचे तळवे चाटले. मग तुम्ही मेघालयात संगमांचं काय चाटताय? असा सवाल उद्धव ठाकरे यांनी उपस्थित केला. तुमच्या बरोबर आला की चांगला आणि बाजुला गेला की भ्रष्ट अशी टीका उद्धव ठाकरे ठाकरेंनी केली. तसेच भाजप संपूर्ण देश नासवण्याचं काम करत असल्याचं उद्धव म्हणाले.