कोल्हापूर: कुस्तीसाठी भाजप उतरला तर स्पर्धेआधी धाडी टाकतील. कोल्हापूर भगव्याचा बालेकिल्ला आहे.मर्दाने मर्दासारखं लढावं. मुख्यमंत्री उद्धव ठाकरे यांनी कोल्हापूरच्या शिवसैनिकांशी संवाद साधताना भाजपवर टीकास्त्र सोडले. काल सत्यजित कदम यांच्या प्रचारासाठी देवेंद्र फडणवीस आले होते तेव्हा त्यांनी महाविकासआघाडी वर निशाणा साधला याला प्रत्युत्तर मुख्यमंत्र्यांनी आज दिले.

ते म्हणाले,आम्ही शिवरायांचे मर्द मावळे आहोत. खोटं बोलणे आमच्या रक्तात नाही. आम्ही खोटं बोलण्यात कमी पडतो पण खोटं बोलणं रक्तात नाही असाही टोला लगावला.

पुढे ते म्हणाले, भाजपाला काही प्रश्न विचारायचे असतील तर जनतेच्या साक्षीने मला विचारू द्या. आमच्या कामात कुठं खोटं असेल तर जनतेसमोर आमचा पर्दाफाश करू देत असे आव्हान मुख्यमंत्र्यांनी भाजपाला दिले. महाविकास आघाडी खोट बोलत नाही. आम्ही उघडपणे सर्व करतो, काळोखात काही करत नाही. धार्मिक तेढ निर्माण करण्याचा काहीजण प्रयत्न करत आहेत असा आरोपही त्यांनी केला.

भाजपने हिंदुत्वाचा ठेका घेतला नाही. भाजप म्हणजे हिंदुत्व नाही असाही घणाघात ठाकरेंनी केला.भाजपाला सोडलं म्हणजे हिंदुत्वाला सोडलं असं नाही. शिवसेना समोरून वार करते, पाठीमागून वार करत नाही.खरं करून दाखवण्यासाठी वाट्टेल ते करण्याची तयारी शिवसेनेची आहे. भाजप सोबतची युती आम्ही तोडली नाही भाजपान तोडली असेही ते म्हणाले.

कोल्हापूरकरांनी भगवा अबाधित ठेवला असं म्हणत कोल्हापूरकरांचे आभार मानले. यावेळी त्यांनी महाराष्ट्र केसरीचा किताब मिळवलेल्या पृथ्वीराज पाटील यांचंही कौतुक केले.