Uddhav Thackeray News: माजी मुख्यमंत्री उद्धव ठाकरे यांनी आगामी निवडणुकांची जय्यत तयारी सुरू केली आहे. ठाकरे गटाच्या बैठकांवर बैठका होत आहे. उद्धव ठाकरे सर्व मतदारसंघांचा आढावा घेत आहेत. दरम्यान शिवसेना पदाधिकारी आणि माजी नगरसेवकांची बैठक पार पडली. या बैठकीत उद्धव ठाकरे यांनी मोठं विधान केलं आहे. साम टीव्हीने याबाबत माहिती दिली आहे.

उद्धव ठाकरे म्हणाले, मी भाजपसोबत पॅचअप करू शकलो असतो. पण ते माझ्या नितीमत्तेत बसत नव्हतं. कारण स्वाभिमान महत्वाचा होता. शिवसेनेचा दरारा कायम राखणं महत्त्वाचं होतं. त्यामुळे मी कोणतीही तडजोड केली नाही. (latest marathi news)

ज्यांनी 2014 पासून आपल्याला फसवलं, 2014 विधानसभा, 2017 मुंबई महापालिका आणि 2019 मातोश्रीत दिलेला मुख्यमंत्री पदाचा शब्द नाही पाळला नाही. त्यांच्यासोबत कसे काय जाणार?, असा प्रश्न उद्धव ठाकरे यांनी उपस्थित केला.

उद्धव ठाकरे म्हणाले, मी मुख्यमंत्री होतो. माझ्या आमदारांना डांबून ठेवू शकलो असतो. पण जे मनाने फुटले होते त्यांना डांबून काय करणार? त्यांना मी काय कमी केलं?. जुने निष्ठावंत पक्ष सोडून जातात त्याचे वाईट वाटते. तुमच्या पैकी कुणाला जायचे असेल तर खुशाल जाऊ शकता. संकटं येतात, संकटं जातात. मी खंबीर आहे.

पुन्हा सत्तेत येणार-

आपण पुन्हा सत्तेत येणार. माझा काही स्वार्थ नाही. मला निवडणूक लढवायची नाही. तुम्ही निवडणूक लढवता, निवडून येता. पक्ष-कार्यकर्ते तुम्हाला मोठे करतात आणि मग मोठे झाल्यावर तुम्ही पक्ष सोडून जाता, अशी खंत उद्धव ठाकरे यांनी बोलून दाखवली.