यवतमाळः पक्षामध्ये झालेल्या पडझडीनंतर उद्धव ठाकरेंनी महाराष्ट्र दौरा सुरु केला आहे. सुरुवातीला ते विदर्भातील जिल्हे पिंजून काढणार आहेत. आज पोहरादेवीचं दर्शन घेऊन उद्धव ठाकरेंनी दौऱ्याला सुरुवात केली.

पोहरादेवीच्या दर्शनानंतर उद्धव ठाकरेंनी संजय राठोड यांचा मतदारसंघ दिग्रस येथे जाहीर सभा घेतली. यावेळी त्यांनी मोदी-शाह यांच्यासह राज्य सराकर आणि बदलेली नवीन समीकरणं; यावरुन जोरदार टीकास्र सोडलं. शिवाय पोहरादेवी संस्थानने दिलेल्या आशीर्वादाचाही उल्लेख केला.

उद्धव ठाकरे म्हणाले की, आमदार खासदार गेले तरी चालतील, दमदार शिवसैनिक माझ्यासोबत आहेत. देवेंद्र फडणवीस मुख्यमंत्री होते तेव्हा मी पोहरादेवीला आलो होतो. मी विकासाचा आराखडा मंजूर केली आणि निधी दिला.. परंतु अद्याप इथे काहीही काम झालेलं नाही. निदान रस्ता तरी करायचा? निधी कुठे गेला कुणी खाल्ला? याबद्दल सरकारने उत्तर द्यावं.

ते पुढे म्हणाले की, पोहरादेवीच्या दर्शनाला गेलो. सुनिल महाराज आणि साधू-संतांनी आशीर्वाद दिले. मला एक पट्टा दिला, कडं दिलं. या कड्याचं महत्व असं आहे की, आम्ही तुम्हांला दत्तकपुत्र मानतो, असं महंत म्हणाले. त्यामुळे पोहरादेवीचा विकास करुन अभिमान वाटेल, असं चित्र निर्माण करुन दाखवायचं आहे. सरकारच्या नाकात दम आणून तीर्थक्षेत्राचा कायापालट करुन दाखवायचा असल्याचं उद्धव ठाकरे म्हणाले.

उद्धव ठाकरेंच्या भाषणातील मुद्दे...

• शेतकऱ्यांच्या आत्महत्या सुरु आहेत आणि हे लोक दुसऱ्यांची घरं फोडत आहेत

• घरं फोडण्याचं हिंदुत्व तुम्हांला मान्य आहे का?

• तुमचं सरकार आहे तर वीज बिल माफ करा

• घरी बसून मी महाराष्ट्र सांभाळून दाखवला होता

• तुम्ही गावोगावी फिरुन आशीर्वाद घेऊन देखवा

• मी नेतृत्व करायचं की नाही हा अधिकार मला आहे, मोदी-शाहांनी ठरवायचं नाही

• गद्दारांना गाडण्याची ताकद आई जगदंबा आम्हांला देणार आहे