माजी मुख्यमंत्री उद्धव ठाकरे आणि राज्याचे उपमुख्यमंत्री देवेंद्र फडणवीस यांच्यात मागील काही दिवसांपासून शाब्दीक चकमक सुरू आहे. बोलतांना देवेंद्र फडणवीसांनी २०१९मध्ये उद्धव ठाकरेंसोबत बंद दाराआड झालेल्या चर्चेचा पुन्हा उल्लेख केला. यावेळी फडणवीसांनी उद्धव ठाकरेंवर टीका जेव्हा जेव्हा बेईमानी होईल तेव्हा तेव्हा कूटनीतीचा वापर करावाच लागेल असं विधान केलं. दरम्यान या टीकेला ठाकरेंनी जोरदार प्रत्तुत्तर दिलं आहे.

उद्धव ठाकरे म्हणाले की, काल अर्धे उपमुख्यमंत्री बोलले की आमची कूटनीती आहे. राष्ट्रवादी सोबत गेलो ती त्यांची कुटनीती आहे. ही कूटनीती आपल्याला कुटून टाकायची आहे. त्यांना कळलेला नाही की जनतेचा खलबत्ता किती मोठा आहे. तुमची आतल्याआत खलबतं चालतात. चाणक्य नेहमी खलबतं करतो. जनतेकडे खलबत्ता असतो, त्या खलबत्त्यामध्ये चाणक्य आणि त्याची कूटनीती आपल्याला कुटून त्याचं चूर्ण करून टाकायचं आहे.

उद्धव ठाकरे पुढे बोलताना म्हणाले की, केंद्रीय तपास यंत्रणा आपल्या कार्यकर्त्यांच्या मागे लावतात. आज सकाळी मी ममता बॅनर्जी यांच्याशी बोललो, त्यांचं अभिनंदन केले. यांच्याकडे पण हेच चालले आहे, केंद्रीय राखीव दल आणून सुद्धा, हिंसाचार करून सुद्धा ममतांच्या जनतेने त्यांची लाँड्री धुवून टाकली. भाजपकडे लाँड्री आहे असं म्हणतात, भ्रष्टाचारी असला की लाँड्रीत टाकून स्वच्छ करून घेतात. बंगाल आणि कर्नाटकने सुद्धा यांच्या लाँड्रीची विल्हेवाट लावून टाकली तशीच लाँड्रीची विल्हेवाट आपल्याला तुमच्या सगळ्यांच्या साक्षीने महाराष्ट्रात करायची आहे, असे उद्धव ठाकरे म्हणाले.

तुमच्यामध्ये उत्साह आहे आणि त्या उत्साहमध्ये राग सुद्धा आहे. महाराष्ट्रात फिरतोय, पोहरादेवीचं दर्शन घेतलं. वृत्तपत्रामध्ये बातमी येते शिवसेनेला धक्का, आपल्याला धक्का देणारा जन्माला आलेला नाही. होतं ते चांगलं होतं, गद्दारी केली त्यांनी केवळ शिवसेनेशी नाही तर तुमच्याशी आणि तुमच्या विभागातील जनतेशी केली, ही गद्दारी आता गाढून टाकायची आहे असेही उद्धव ठाकरे यावेळी म्हणाले.