उद्धव बाळासाहेब ठाकरे गटाचे प्रमुख उद्धव ठाकरे हे आज नागपुरात होते. यावेळी छत्रपती शिवाजी महाराजांच्या पुतळ्याचे अनावरण करण्यात आले आहे. यावेळी उद्धव ठाकरेंनी भाषण केले आहे. यात त्यांनी विरोधकांवर जोरदार निशाणा साधला आहे.

उद्धव ठाकरे म्हणाले की, माध्यमांमुळे दिल्लीतील ठग आपल्याकडे बघणार आहेत. अजून निवडणुकीचे वातावरण तापलेलं नाही आहे. रामटेक हा शिवसेनेचा बालेकिल्ला आहे. सिनेटच्या निवडणुकीत विरोधातील उमेदवारांची डिपॉझिट जप्त झाली असती. काही जण कोर्टात गेले. निवडणुकीचा दिवस बदलला. तरीही आम्ही जिंकलो. आता मशाल पेटलेली आहे. ही मशाल आता अंधार दूर करणार आहे, असं ते म्हणाले.

मालवणची घटना लाजिरवाणी आहे. पुतळा उभारण्यातही तुम्ही पैसे खाल्ले आहेत. त्यात सामग्री गंजलेली वापरली. त्यामुळे पुतळा पडला आणि एकनाथ शिंदे दाढी खाजवत म्हणतात वाऱ्याने पुतळा पडला. पण मला हे विचारायचे आहे की, वाऱ्याने तुमची दाढी नाही का पडत? एखादी गोष्ट करताना आत्मविश्वास पाहिजे की, जे करतोय ते दैवताला साजेसे करतो आहे. शिवराय आपले दैवत आहेत.

अमित शाहांवर बोलताना ते म्हणाले की, मला ते बोलले होते औरंगजेब फॅन क्लबचा संस्थापक. मात्र मी संस्थापक असेन तर तुम्ही अहमदशाह अब्दाली आहात. हे बंद दारामागचे धंदे सोडा, हिम्मत असेल तर शिवरांयांच्या साक्षीने आम्हाला संपवण्याची भाषा करून दाखवा. हिंम्मत असेल तर शिवसेना संपवून दाखवा, का संपवायची? आम्ही तर तुमच्या सोबतच होतो, असं ते म्हणाले.