नागपूर - काँग्रेस आणि राष्ट्रवादी काँग्रेसबरोबरच्या सरकारबद्दल असंतोष असल्याने आम्ही सर्व खासदारांनी उद्धव ठाकरे यांना भाजपबरोबर जाण्याची विनंती केली. राष्ट्रवादी काँग्रेस आणि काँग्रेसच्या भ्रष्टाचाराला सर्व शिवसैनिक कंटाळले होते; पण, शिवसेनाप्रमुख उद्धव ठाकरे कोणालाच भेटत नव्हते.

शिवसैनिकांना विचारविनिमयासाठी बैठक हवी होती; परंतु, उद्धव ठाकरे यांनी त्यांना कधीच भेटण्यासाठी वेळ दिली नाही, असा दावा खासदार राहुल शेवाळे यांच्याकडून या सुनावणीत करण्यात आला.

शिवसेनेच्या आमदारांच्या अपात्रतेसंबंधी विधानसभा अध्यक्ष राहुल नार्वेकर यांच्यासमोरील सुनावणीत खासदार शेवाळे यांची आज उलटतपासणी घेण्यात आली. मुख्यमंत्री एकनाथ शिंदे यांनी मुख्यमंत्रिपदाच्या लालसेपोटी पक्षप्रमुख उद्धव ठाकरे यांच्या पाठीत खंजीर खुपसला.

त्यांनी आपला पक्ष आणि पक्षाचे कार्यकर्ते यांना पणाला लावले, असा दावा ठाकरे गटाचे वकील देवदत्त कामत यांनी केला. त्याचबरोबर शिंदे यांना देण्यात आलेले मुख्यनेतेपदही बेकायदेशीर असल्याचा दावा ठाकरे गटाकडून करण्यात आला. मात्र, हे दोन्ही दावे खासदार शेवाळे यांनी सुनावणीत फेटाळून लावले आहेत.

तब्बल चार तास झालेल्या या सुनावणीत शिंदे गटाकडून १९९८ ची शिवसेनेची घटना कागदपत्रांबरोबर जोडली. याला ठाकरे गटाने आक्षेप घेतला. शिंदे गटाच्या वकिलांनी २३ जून २०१८ ला झालेल्या शिवसेनेच्या प्रातिनिधिक सभेवरच बोट ठेवले.

आपल्या साक्षीत ही सभाच झाली नसल्याचा दावा शेवाळे यांनी केला. याच सभेत शिंदे यांची पक्षाच्या नेतेपदी निवड झाल्याने ठाकरे गटाच्या वकिलांनी याच दिशेने प्रश्न विचारत शेवाळे यांना अडचणीत टाकण्याचा प्रयत्न केला.