सोलापूर : मयत पतीच्या हिश्श्याच्या जमिनीची वाटणी व हातउसने दिलेले २५ लाख रुपये सतत मागणाऱ्या वहिनीसह तिच्या दोन्ही मुलांना मारणारा दीर शंकर दत्तात्रय मस्के (रा. बोरामणी, ता. दक्षिण सोलापूर) फरार आहे. गुन्ह्यात पाच संशयितांना सोलापूर तालुका पोलिसांनी अटक केली आहे. न्यायालयाने त्यांना ८ मेपर्यंत पोलिस कोठडी ठोठावली आहे. गुन्ह्याच्या मुळाशी जाण्यासाठी शंकरच्या मोबाईलचा पाच दिवसांचा ‘सीडीआर’ मागविल्याचे पोलिस सूत्रांनी सांगितले.

शनिवारी (ता. २) मध्यरात्री दीडच्या सुमारास शंकरने घराच्या टेरेसवर झोपलेल्या वहिनी, पुतण्या व पुतणीला जिवे ठार मारले होते. या गुन्ह्यात मयत गायत्री यांच्या भावाने पोलिसांत फिर्याद दिली होती. त्यावरून पोलिसांनी शंकरची पत्नी राणी, मुलगी दिक्षा, मुलगा धीरज, मेव्हणा सूरज माधवराज मोरे व त्याच्या हॉटेलमधील कामगार सचिन शिवाजी वाघमारे यांना अटक केली. सोमवारी (ता. ४) त्यांना न्यायालयात हजर करण्यात आले. अद्याप संशयित आरोपींनी ‘आपला या गुन्ह्यात सहभाग नाही’ अशीच भूमिका घेतली आहे.

या पार्श्वभूमीवर आता हत्याकांडापूर्वी संशयित आरोपी शंकर मस्के कोणाकोणाच्या संपर्कात होता, घटनेच्या दिवशी तो कोणाकोणाशी बोलला, त्याला कोणाचे कॉल आले होते, या बाबींचा तपास पोलिस करीत आहेत. त्यासाठी पोलिसांनी त्याच्या मोबाईलचे कॉल डिटेल्स मागविले आहेत. पोलिस निरीक्षक राहुल देशपांडे तपास करीत आहेत.

शंकर मस्केच्या शोधासाठी ५ पथके

गुन्ह्यातील मुख्य सूत्रधार शंकर मस्के याने वहिनी गायत्री (वय ४०), पुतणी प्रियंका (वय १७) व पुतण्या शिवराज (वय १५) यांच्यावर तलवारीने वार करून जागीच ठार केले. गुन्ह्यातील पाच संशयितांना पोलिसांनी जेरबंद केले आहे, पण शंकर अजूनही सापडलेला नाही. त्याच्या शोधासाठी सोलापूर तालुका पोलिस ठाण्याची तीन तर स्थानिक गुन्हे शाखेची दोन पथके रवाना झाली आहेत. तो परराज्यात असून सतत जागा बदलत असल्याचे पोलिस सूत्रांनी सांगितले.