मागील काही दिवसांपासून राज्यात कोकणासह पश्चिम महाराष्ट्रात पावसाची रिपरिप सुरु आहे. काल हवामान खात्याने दिलेल्या माहितीनुसार राज्यात पुढील पाच दिवस मुसळधार पाऊस कोसळणार आहे. त्याप्रमाणे काही भागांत पावसाने हजेरी लावली आहे. दरम्यान, आता हवामान खात्यानं आज मुंबई, पनवले आणि कोकणातील काही जिल्ह्यांना पुढील 3 ते 4 तासांत पावसाच्या हलक्या पावसाचा इशारा दिला आहे.

हवामान खात्याने या संदर्भात ट्वीट करत माहिती दिली आहे. आज मुंबई, ठाणे, नवी मुंबई, पनवेल, रायगड, पालघरच्या काही भागात येत्या ३ ते ४ तासांत पावसाच्या हलक्या सरी पडण्याची शक्यता आहे. मुंबई आणि आजूबाजूच्या काही ठिकाणी पाऊस आधीच सुरू झाला आहे. तसेच संपूर्ण कोकणात पुढील ४ ते ५ दिवस मान्सुन सक्रिय राहण्याची शक्यता आहे. त्यामुळे कोकणासह पश्चिम महाराष्ट्रातील अनेक भागात मुसळधार पावसाची शक्यता वर्तवण्यात आली आहे. त्यामुळे महत्वाच्या कामाव्यतरिक्त घरातून बाहेर न पडण्याचे आवाहन करण्यात आले आहे.

गेल्या चार ते पाच दिवसांपासून तापमानात वेगाने बदल होत आहेत. कोकणातील रत्नागिरी, सिंधुदुर्ग व मध्य महाराष्ट्रातील दक्षिण भागातील सातारा, कोल्हापूर या जिल्ह्यात पावसाची संततधार सुरु आहे. या पावसामुळे काही ठिकाणी ढगाळ वातावरणाची शक्यताही आहे. दरम्यान, जून महिना पूर्णत: कोरडा गेला आहे. मात्र जुलै महिन्यात पाऊस सुरु झाला आहे. त्यामुळे कोकणासह काही भागांत शेती कामांना वेग आला आहे. पावसाच्या आगमनाने शेतकरी वर्गातून समाधान व्यक्त केले जात आहे.