आंबेडकरी चळवळीतील कार्यकर्त्या सुषमा अंधारे यांच्या शिवसेना प्रवेशानंतर राजकीय वर्तुळात एक वेगळीच चर्चा रंगली आहे. दरम्यान, महाराष्ट्रातील संपूर्ण वंचित बहुजन आघाडी पक्ष शिवसेनेत येण्याच्या मानसिकतेमध्ये आहे. असे मोठे विधान शिवसेनेचे खासदार विनायक राऊत यांनी केलं आहे.(vanchit bahujan aaghadi to join shivsena mp Vinayak Raut )

विनायक राऊत सध्या सोलापूर दौऱ्यावर आहेत. दरम्यान त्यांनी माध्यमांशी संवाद साधला. रिपब्लिकन पक्षाचे अनेक गट, पीपल्स रिपब्लिकन पार्टीचे प्रा. जोगेंद्र कवाडे यांनी माजी मुख्यमंत्री उद्धव ठाकरे यांची भेट घेऊन समर्थन दर्शवलं आहे. त्यामुळे संपूर्ण वंचित बहुजन आघाडी पक्ष शिवसेनेत येण्याच्या मानसिकतेमध्ये असल्याचे विनायक राऊत यांनी म्हटलं आहे.

दरम्यान, खरी शिवसेना ही उद्धव ठाकरे यांच्या नेतृत्वाखालीलच आहे. त्यामुळे एकत्र यायचं असेल तर उपमुख्यमंत्री देवेंद्र फडणवीसांनी ‘मातोश्री’वर येऊन उद्धव ठाकरे यांच्यासोबत बोलावं. मातोश्रीचे दरवाजे सर्वांसाठी कायमच उघडे आहेत, असेही विनायक राऊत यांनी या वेळी स्पष्ट केले.

विनायक राऊत हे आज आमदार शहाजीबापू पाटील यांच्या सांगोला मतदारसंघात जाहीर सभा घेणार आहेत. त्यामुळे विनायक राऊत हे आमदार शहाजीबापू पाटलांवर काय तोफ डागतात, हे पाहणं उत्सुत्याचे ठरणार आहे.

सुषमा अंधारेंनी गाजवल्या होत्या राष्ट्रवादीच्या सभा

2019 च्या विधानसभा निवडणुकीत सुषमा अंधारेंनी राष्ट्रवादी काँग्रेसच्या सभा गाजवल्या होत्या. राष्ट्रवादीच्या त्या स्टार प्रचारक होत्या. जितेंद्र आव्हाडांच्या प्रचारासाठी त्यांनी सभा घेतली होती. या सभेत त्यांनी बाळासाहेब ठाकरे, उद्धव ठाकरेंसह आदित्य ठाकरेंवर अत्यंत गंभीर टीका केली होती. त्यांच्या या भाषणाचा व्हिडिओ चांगलाच व्हायरल झाला होता.