सोलापूर : पावसाळा संपल्यानंतर आता भाजीपाल्यांचे दर वाढू लागले आहेत. रब्बी पेरणीची तयारी व कांदा लागवड, यामुळे कमी क्षेत्रावर भाजीपाल्याची लागवड आहे. कोथिंबीर, टोमॅटो, गवारी, लसूण, दोडका, कारले, हिरवी मिरची, वांगी, भेंडी अशा भाजीपाल्यांचे दर वाढले आहेत. त्यामुळे गृहिणींचे बजेट कोलमडल्याचे चित्र पहायला मिळत आहे.

कोणतीही भाजी करायची झाली की, जिरे- मोहरी आणि लसूण आवश्यक असतो. परंतु, मागील महिनाभरात लसणाची आवक कमी झाल्याचा थेट परिणाम दरावर झाला आहे. दीड महिन्यापूर्वी अवघ्या १०० ते १३० रुपये किलो दरात मिळणारा लसूण सध्या ३५० रुपये किलोवर पोचला आहे. काही दिवसांत लसणाचे दर झपाट्याने वाढत आहेत. सध्या बाजारात लसणाचे भाव ३४० रुपये किलोपर्यंत आहे.

खराब हवामानामुळे अनेक राज्यांमध्ये लसूण पिकांचे नुकसान झाले आहे. लसणाच्या भावात वाढ होण्यामागे हेच प्रमुख कारण सांगितले जात आहे. मुसळधार पावसामुळे लसूण लागवड विलंबाने झाली असून तो लसूण बाजारात यायला आणखी काही दिवसांचा अवधी आहे. त्यामुळे आणखी काही दिवस लसणाची फोडणी महागच असणार आहे.

असे आहेत भाजीपाल्याचे दर

• लसूण : २१० ते ३४० रुपये

• गवारी : ३५ ते ८० रुपये

• वांगी : २५ ते ६० रुपये

• दोडका : २५ ते ६० रुपये

• टोमॅटो : २५ ते ५५ रुपये

• भेंडी : २५ ते ४० रुपये

• कारले : २० ते ३५ रुपये

• हिरवी मिरची : २० ते ४५ रुपये

कांद्याला २५ ते ३० रुपयांचाच दर

कांद्याला पाच हजार रुपये प्रतिक्विंटल दर अपेक्षित असतानाही शेतकऱ्यांना सध्या २५ ते ३० रुपये किलो दराने नवीन कांदा विकावा लागत आहे. सोलापूर कृषी उत्पन्न बाजार समितीत दररोज सरासरी अडीचशे गाड्या कांदा आवक आहे. त्यात पावसाने भिजून खराब झालेला कांदाही लक्षणीय आहे. त्यासाठी १० रुपये ते १५ रुपये किलोचा दर मिळत आहे. अन्य भाजीपाल्यांचे दर वाढत असतानाच कांद्याचे दर मात्र वाढले नसून सध्या ते स्थिर आहेत.

लसणाची आवक घटल्याने भावात वाढ

भारतात सुमारे ३२ ते ३५ लाख टन लसणाचे उत्पादन होते. भारतात लसणाचे सर्वाधिक उत्पादन मध्य प्रदेशात होते. चीनमध्ये दरवर्षी सुमारे २ ते २५ दशलक्ष टन लसणाचे उत्पादन केले जाते, तरी दोन्ही देशांमध्ये बहुतेक लसणाचा वापर देशांतर्गत केला जातो. सोलापूरात येणारा लसूण हा मध्यप्रदेश व कर्नाटकचा असतो. यंदा पर्जन्य अधिक झाल्याने आवक कमी आहे.

- शिवशंकर बिराजदार, लसूण व्यापारी, सोलापूर