ज्येष्ठ पत्रकार, नाटककार साहित्य अकादमी पुरस्कारविजेते लेखक जयंत पवार यांचे निधन झाले. 61 व्या वर्षी त्यांनी अखेरचा श्वास घेतला. अस्वस्थ वाटू लागल्यामुळे त्यांना रुग्णालयात दाखल करण्यात आलं होतं. मात्र, उपचारादरम्यान पहाटे दोन वाजता त्यांची प्राणज्योत मालवली. त्यांच्या पश्चात त्यांची पत्नी पत्रकार, लेखिका संध्या नरे व मुलगी असा परिवार आहे.

जयंत पवार यांनी लिहिलेली अनेक नाटके गाजली आहेत. अखिल भारतीय मराठी नाट्य परिषदेने घेतलेल्या नाट्यलेखन स्पर्धेत ‘काय डेंजर वारा सुटलाय’ या नाटकासाठी जयंत पवार यांना सर्वोत्कृष्ट लेखनाचे प्रथम पारितोषिक मिळाले होते. 2014 मध्ये महाड येथे झालेल्या कोकण मराठी साहित्य परिषदेच्या साहित्य संमेलनाचे अध्यक्षपद जयंत पवार यांनी भूषवले होते. 'फिनिक्सच्या राखेतून उठला मोर' या कथासंग्रहासाठी 2012 चा साहित्य अकादमी पुरस्कार देखील मिळाला होता.

जयंत पवार यांनी लिहलेली नाटके

अंधातर, काय डेंजर वारा सुटलाय, टेंगशेच्या स्वप्नात ट्रेन, दरवेशी, पाऊलखुणा, फिनिक्सच्या राखेतून उठला मोर, बहुजन संस्कृतिवाद आणि लेखक, माझे घर, वंश, शेवटच्या बीभस्ताचे गाणे, होड्या