मॉन्सूनच्या परतीसाठी पोषक स्थिती असून, राज्याच्या बहुतांश भागांमध्ये पावसाने उघडीप दिली आहे. शहर आणि परिसरातही गणेशोत्सवानंतर पावसाचा जोर ओसरल्याचे दिसून येत आहे.

काल (मंगळवारी)उन्हाचा ताप वाढला. पुढील दोन दिवस पुणे व परिसरात अंशतः ढगाळ वातावरणासह अधूनमधून रिमझिम पावसाची शक्यता आहे, असा अंदाज हवामान विभागाने वर्तवला आहे. पावसाने उघडीप देताच उन्हाचा ताप जाणवू लागला आहे. गेल्या दोन दिवसांपासून पावसाने काहीशी विश्रांती घेतली आहे. सरासरीपेक्षा कमी असलेल्या कमाल तापमानात आता पुन्हा वाढ झाली आहे.

दरम्यान ऑक्टोबर महिना सुरू होताच राज्यातील पावसाचा जोर कमी झाला आहे. आता मान्सूनच्या परतीच्या प्रवासाला सुरुवात होत आहे. परतीच्या प्रवासादरम्यान राज्यातील काही जिल्ह्यांमध्ये मुसळधार पावसाची शक्यता वर्तवण्यात आली आहे.

यंदा मान्सून 8 ते 10 ऑक्‍टोबरच्या सुमारास मुंबई-पुण्यातून माघार घेणार असल्याचा अंदाज हवामान विभागाने वर्तवला आहे. राज्यात मान्सून संपला असून आता परतीचा पाऊस असणार अशी माहिती हवामान विभागाने दिली आहे. पुढील 2-3 दिवसात राज्यात परतीचा पाऊस सुरू होणार आहे.

तर राज्याच्या काही भागांमध्ये मेघगर्जनेसह मुसळधार पाऊस हजेरी लावेल, अशी माहिती के एस होसाळीकर यांनी दिली आहे. आगामी 2-3 दिवसांमध्ये राज्याच्या दक्षिण भागात चांगला पाऊस होण्याची शक्यता असून काही दिवस आकाश ढगाळ राहील, असा अंदाज आहे