देशासह राज्यातील हवामानात बदल होताना दिसत आहे. काही राज्यांमध्ये थंडीचा कडाका वाढला आहे. तर, काही राज्यांमध्ये मुसळधार पावसाची शक्यता हवामान विभागाने वर्तवली आहे. बंगालच्या उपसागरातून येणाऱ्या दमट वाऱ्यांमुळे देशाच्या हवामानात बदल होत असून ढगाळ वातावरण दिसून येत आहे. यामुळे देशाच्या काही भागात थंडीही कमी झाली आहे. येत्या काही दिवसात वेस्टर्न डिस्टर्बन्स सक्रिय होण्याची शक्यता असून त्यामुळे काही ठिकाणी पावसाची शक्यता आहे.

हवामान विभागाच्या अंदाजानुसार, पंजाब, हरियाणा, चंदीगड, दिल्ली आणि राजस्थान या राज्यांमध्ये पुढील 2 दिवसात कडाक्याच्या थंडी राहणार आहे. तर 8 ते 10 जानेवारी दरम्यान वायव्य आणि मध्य भारतात गडगडाटासह वादळी वाऱ्यांसह गारपिटी आणि सक्रिय पाऊस पडण्याची शक्यता आहे. हवामान विभागाने दिलेल्या माहितीनुसरा, राजस्थान आणि पश्चिम मध्य प्रदेशात गारपीट होण्याची शक्यता आहे.

पुढील 5 दिवस दक्षिण भारतात मुसळधार पावसाची शक्यता हवामान खात्याने वर्तवलीय आहे. केरळमध्ये 2 दिवस मुसळधार आणि दक्षिण द्वीपकल्पीय भारतात हलका पाऊस पडण्याची शक्यता आहे. तामिळनाडूमधील किनारी भागातील मच्छिमारांना विशेष इशारा देण्यात आला आहे.

महाराष्ट्रात काय परिस्थिती?

गेल्या दोन दिवसांपासून राज्यातील काही भागांमध्ये हलक्या ते मध्यम स्वरूपाच्या सरी कोसळल्या. आजही महाराष्ट्रातील काही भागांमध्ये पावसाचा अंदाज आहे. यासोबतच गुजरात, उत्तर-पश्चिम भारत, मध्य भारतातही पावसाची शक्यता आहे.