मुंबई - नाताळ आणि नववर्षाच्या स्वागतासाठी हॉटेल-रेस्टॉरंट-पबमध्ये लावण्यात येणाऱ्या बॉलिवूडच्या गाण्यांवर आता मुंबई उच्च न्यायालयाचा लगाम बसला आहे. हॉटेलचालकांना ही गाणी लावण्यापूर्वी ‘फोनोग्राफिक परफॉर्मन्स लिमिटेड’ची परवानगी घेणे बंधनकारक केले आहे.

ताज्या बातम्यांसाठी डाऊनलोड करा ई-सकाळचे ऍप

हॉटेल व पबमध्येही विविध प्रकारचे आकर्षक कार्यक्रम आयोजित केले जातात. ज्यात बॉलिवूडच्या चित्रपटांतील गाणी मुख्य आकर्षण असतात. मात्र, जर फोनोग्राफिक परफॉर्मन्सचा परवाना नसताना ही गाणी लावली गेली, तर संबंधित हॉटेल-पबवर कारवाई होऊ शकते. ‘पीपीएल इंडिया’ संस्थेकडे सुमारे २५ लाखांहून अधिक गाण्यांची नोंदणी असून विविध भाषांमधील गाण्यांचा यात समावेश आहे. त्यानुसार गाण्यांचा वापर करण्यासाठी संस्थेचे शुल्क आणि परवाना मिळणे अत्यावश्‍यक आहे. याबाबत संस्थेच्या वतीने गतवर्षी न्यायालयात दावा करण्यात आला होता. याच मागणीसाठी संस्थेच्या वतीने पुन्हा न्यायालयात अर्ज करण्यात आला. न्यायालयाने तूर्तास त्यांची मागणी मान्य केली आहे. यावर पुढील सुनावणी २८ जानेवारीला होणार आहे.