माँसाहेब अर्थात मीनाताई ठाकरे (Meenatai Thackeray) यांचा आज (६ जानेवारी) जयंती दिन. शिवसेनाप्रमुख बाळासाहेब ठाकरे (Balasaheb Thackeray) यांच्या आयुष्यात पत्नी मीनाताई ठाकरे यांचा सिंहाचा वाटा होता. शिवसेना घडवण्यात माँसाहेबांनी वेळोवेळी केलेल्या मदतीचे अनेक संदर्भ आपल्याला पहायला मिळतात. मात्र त्यांची हळवी बाजू ही फक्त बाळासाहेब ठाकरेंनाच माहित होती. माँसाहेबांच्या स्वभावाचे विविध पैलू अनेकांच्या मुलाखतींतून ऐकायला मिळतात. अशाच एका मुलाखतीत खुद्द बाळासाहेब हे माँसाहेबांच्या भावनिक स्वभावाविषयी व्यक्त झाले होते. राज ठाकरे (Raj Thackeray) शिवसेनेपासून दुरावल्याचं माँसाहेबांना सहन झालं नसतं, असं ते म्हणाले. (Shivsena)

माँसाहेब असत्या तर राज ठाकरे शिवसेनेपासून दुरावले असते का, असा प्रश्न एका वृत्तवाहिनीला दिलेल्या मुलाखतीत बाळासाहेबांना विचारण्यात आला होता. त्यावर ते म्हणाले, 'एवढं झालं असतं की नसतं हा एकेकाच्या स्वभावावर अवलंबून आहे. माणूस किती प्रेमळ असतो आणि केव्हा निर्दयी होतो, हे पहावं लागतं. निर्दयीपणाची सीमा असते की नसते याची मला कल्पना नाही पण निर्दयीपणाचा कळस होऊ शकतो. ते तिला सहन झालं नसतं.'

बाळासाहेबांनी त्यांच्या आयुष्यात सहन केलेल्या मोठ्या धक्क्यांविषयी ते पुढे म्हणाले, 'मी तीन धक्के सहन केले. १९९५ साली माँ गेली. त्यानंतर १९९६ साली १० फेब्रुवारीला माझ्यावर बायपासची शस्त्रक्रिया झाली. एप्रिल २० या तारखेला माझा मोठा मुलगा बिंधूमाधवचा अपघात झाला. मी नेहमी म्हणतो, माँ असताना बिंदूमाधव गेला असता तर ती हार्ट अटॅकनंही गेली असती. तिला सहन झालं नसतं. ती खूप सात्विक आणि धार्मिक होती. घराण्याबद्दल तिला प्रचंड प्रेम आणि आपुलकी होती. राजच्या बाबतीतसुद्धा जे झालं, ते ती सहन करू शकली नसती. राजचं वागणं तिला सहन झालं नसतं.'

बाळासाहेबांच्या आयुष्यात माँसाहेबांचं स्थान काय आहे, असं विचारला असता त्यांनी खिशातून एक फोटो काढला. हा फोटो माँसाहेबांचा होता. महत्त्वाच्या ठिकाणी जाताना खिशात त्यांचा फोटो नेहमीच ठेवतो, असं त्यांनी सांगितलं.