मुंबईः भाजपच्या वतीने राज्यभरात सध्या सावरकर गौरव यात्रा काढण्यात येत आहे. आज बीडमध्येदेखील ही यात्रा निघाली. मात्र या यात्रेला खुद्द भाजपच्या राष्ट्रीय सचिव पंकजा मुंडे आणि बीड जिल्ह्याच्या खासदार प्रीतम मुंडे अनुपस्थित होत्या. त्यामुळे आश्चर्य व्यक्त होत आहे.

काँग्रेस नेते राहुल गांधी यांनी सावरकरांवर खालच्या स्तरावर टीका केल्यानंतर भाजपमधमून संताप व्यक्त होत आहे. त्यामुळे राज्यात भाजप-शिवसेनेच्या वतीने सावरकर गौरव यात्रा काढण्यात आलीय. प्रत्येक जिल्ह्यात स्वतंत्रपणे ही यात्रा निघत आहे. आज बीडमध्ये या यात्रेचं आयोजन करण्यात आलेलं होतं.

हेही वाचा - सामान्यांचा पैसा सुरक्षित ठेवण्यासाठीच Virtual Currency करकक्षेत

बीडमध्ये निघालेल्या सावरकर गौरव यात्रेला भाजपच्या राष्ट्रीय सचिव पंकजा मुंडे आणि बीडच्या खासदार प्रीतम मुंडे यांची अनुपस्थिती होती. पंकजा मुंडे आणि देवेंद्र फडणवीस यांच्यातील अंतर्गत सुप्त कलहामुळे मुंडे भगिनींनी गौरव यात्रेकडे पाठ फिरवली का? असा प्रश्न उपस्थित होत होता.

मुंडे भगिनी बीडमधील सावकर गौवर यात्रेला उपस्थित न राहण्याचं कारण समोर आलेलं आहे. दिल्लीत संसदेचं अधिवेशन सुरु आहे. त्यामुळे प्रीतम मुंडेंना अधिवेशन सोडून येता येत नाही. पक्षाचा व्हिप असल्यामुळे त्या येऊ शकत नसल्याचं त्यांच्या कार्यालयाच्या वतीने स्पष्ट करण्यात आलंय.

तर पंकजा मुंडे ह्या मुंबईत भाजपच्या स्थापना दिनाच्या कार्यक्रमाला हजर होत्या, त्यामुळे त्याही बीडमध्ये जावू शकल्या नाहीत. तसंही मुंडे भगिनींचं कार्यक्रम पत्रिकेमध्ये नाव नव्हतं. त्यामुळे त्यांच्या उपस्थितीही शक्यताही नव्हतीच, असं सांगण्यात येतंय. 'एबीपी माझा'ने यासंदर्भातील वृत्त दिले आहे.