नागपूरः राज्य विधीमंडळाच्या हिवाळी अधिवेशनाचा आज शेवटचा दिवस होता. आजही सत्ताधारी आणि विरोधकांमध्ये आरोप-प्रत्यारोपांचं राजकारण पहायला मिळालं.

आज विधानसभेचे विरोधी पक्षनेते देवेंद्र फडणवीस एक गौप्यस्फोट करुन खळबळ उडवून दिली आहे. महाविकास आघाडी सरकारकडून आमच्या अनेक आमदारांना त्रास दिला जात होता. मलाही तुरुंगात टाकण्याचा प्लान आखल्याचं फडणवीस यांनी सांगितलं.

हेही वाचाः जोखमीचे भान राखूनच करा SIP मध्ये गुंतवणूक

ते पुढे म्हणाले की, मला जेलमध्ये टाकण्यासाठी तयारी झाली होती. संजय पांडे यांना याबाबत जबाबदारी दिली होती, असं देवेंद्र फडणवीस म्हणाले. विशेष म्हणजे कंगना रणौत हिचं घर पाडण्यासाठी ८० लाख वकिलाला दिल्याचं त्यांनी सांगितलं.

'हे आमच्या मंत्र्यांवर आरोप लावतात आणि राजीनामा मागतात. यांचे मंत्री जेलमध्ये गेले तरी राजीनामा घेतला नाही. मुख्यमंत्र्यांवर आरोप करुन तुम्ही तोंडावर पडलात' असंही फडणवीस म्हणाले.

रेशीमबाग भेटीवरुन राजकारण- सीएम

मुख्यमंत्री एकनाथ शिंदे म्हणाले की, आम्ही रेशीमबाग येथे भेट दिली, त्यावरून राजकारण केलं गेलं. मला रेशीमकिडा म्हटलं गेलं. पण मी सांगू इच्छितो की, मी रेशीमबागेत गेलो, तुमच्यासारखा गोविंदबागेत नाही. आम्हाला म्हणतात, बाप चोरला. अहो, बाळासाहेब आमच्यासाठी पितृतुल्यच आहेत. जन्म दिला नसला तरी त्यांनीच आम्हाला घडवलं. त्यामुळे त्यांच्या विचारांची प्रतारणा आम्ही कधीही केली नाही, असंही शिंदे म्हणाले.

मुख्यमंत्रीपदाच्या लालसेसाठी बाळासाहेबांचे विचार संपविण्याचा प्रयत्न केला. ज्यांनी बाळासाहेबांना तुरुंगात टाकलं त्यांच्या मांडीला मांडी लावून तुम्ही बसले. बाळासाहेबांचे विचार तुम्ही विकले. शिंदे पुढं म्हणाले की, खुर्चीसाठी तुम्ही पाप केलं. एक म्हण आहे, 'हिऱ्यापोटी गारगोटी..', असं म्हणत शिंदे यांनी उद्धव ठाकरे यांचं नाव न घेता जहरी टीका केली.