कोगनोळी : महाराष्ट्रातील (maharashtra) कोल्हापूर जिल्ह्यात कोरोना रुग्ण वाढत आहेत. त्या पार्श्वभूमीवर आरटी-पीसीआर रिपोर्ट (RT-PRC report) किंवा कोरोना प्रतिबंधक लस (covid-19 vaccine) घेतल्याचा दाखला असल्याशिवाय कर्नाटकात (karnatak) प्रवेश दिला जाणार नाही. बेळगाव जिल्ह्यात कोरोना रुग्णांच्या संख्येत घट झाली आहे. सध्या जिल्ह्यात 3.2 टक्के रुग्ण प्रमाण आहे. नागरिकांनी महत्त्वाच्या कामाशिवाय घरातून बाहेर पडून नये, आपल्या आरोग्याची काळजी घ्यावी, अशी सूचना जिल्हाधिकारी एम. जी. हिरेमठ यांनी केली. येथील राष्ट्रीय महामार्गावरील (MH 04) कर्नाटक सीमा तपासणी नाक्याला त्यांनी शनिवारी (26) भेट दिली. यावेळी ते बोलत होते.

यावेळी तपासणी नाक्यावर असणाऱ्या कर्मचाऱ्यांना त्यांनी विविध सूचना केल्या. नाक्यावर महाराष्ट्रातून येणाऱ्या प्रवाशांची कडक तपासणी करण्याच्या सूचना दिल्या आहेत. यावेळी चिक्कोडीचे प्रांताधिकारी युकेशकुमार, निपाणीचे तहसीलदार प्रकाश गायकवाड, मंडल पोलिस निरीक्षक एस. व्ही.शिवयोगी, शहर पोलिस ठाण्याचे उपनिरीक्षक अनिल कुंभार, निपाणी नगरपालिकेचे आयुक्त महावीर बोरण्णावर, निपाणीचे सर्कल अजित वंजोळे, कोगनोळीचे तलाठी के. एल. पुजारी, एएसआय एस. ए. टोलगी, विजय पाटील, एस. आय. कुभार यांच्यासह अधिकारी व पोलिस कर्मचारी उपस्थित होते.