मुंबई - ‘छोटे कुटुंब, सुखी कुटुंब’ ही संकल्पना यशस्वी करण्यासाठी पुरुषांच्या तुलनेत महिलाच पुढाकार जास्त घेत असल्याचे अधोरेखित झाले आहे. मुंबईत दरवर्षी सरासरी २० हजार महिलांवर कुटुंबनियोजनाची शस्त्रक्रिया होते. त्या तुलनेत २०१८-१९ या वर्षात मुंबईत केवळ १००२ पुरुषांची नसबंदी झाली आहे. विशेष म्हणजे काळबादेवी, डोंगरी आणि बोरिवली परिसरात नसबंदीची एकही शस्त्रक्रिया झाली नाही.

ताज्या बातम्यांसाठी डाऊनलोड करा ई-सकाळचे ऍप

समाजामध्ये महिलांनीच कुटुंबनियोजनाची शस्त्रक्रिया करावी, अशी मानसिकता असल्याने महिलांचे प्रमाण जास्त आहे. तसेच, पुरुषांच्या नसबंदीबाबत समाजात आजही अनेक गैरसमज आहेत. त्यामुळे अनेक पुरुष या शस्त्रक्रियेसाठी तयार होत नाहीत. गेल्या काही वर्षांत हे प्रमाण वाढत असले, तरीही महिलांच्या तुलनेने हे प्रमाण मात्र अत्यंत नगण्य आहे, असे पालिकेच्या आरोग्य विभागाच्या अधिकाऱ्याने सांगितले. २०१८-१९ मध्ये महाराष्ट्रात तीन लाख २८ हजार ६६ महिलांवर कुटुंबनियोजनाची शस्त्रक्रिया झाली. त्या तुलनेत केवळ नऊ हजार ७३९ पुरुषांची नसबंदी झाली.

ठाकरे सरकारचा आणखी एक दणका; आता लक्ष्य ऍक्सिस बँक

दोन वर्षांत २५ टक्के प्रमाण वाढले
पुरुषांनी कुटुंबनियोजनाची जबाबदारी स्वीकारण्याचे प्रमाण महिलांपेक्षा कमी असले, तरी गेल्या दोन वर्षांत पुरुषांच्या नसबंदीचे प्रमाण २५ टक्‍क्‍यांनी वाढले आहे. २०१६-१७ मध्ये ७२५, २०१७-१८ मध्ये ९१४; तर २०१८-१९ मध्ये १००२ पुरुषांवर शस्त्रक्रिया झाली.