मुंबई- काँग्रेस प्रदेशाध्यक्ष नाना पटोले यांनी कार्यकर्त्यांकडून चिखलात माखलेले पाय धुऊन घेतल्याचा एक व्हिडिओ व्हायरल झाला होता. यावरून विरोधकांनी पटोले यांच्यावर टीकेची झोड उठवली आहे. यावरून नाना पटोले यांनी स्पष्टीकरण दिलं आहे. ते पत्रकार परिषदेमध्ये बोलत होते.

पाय धुण्याचा व्हिडीओ मी पाहिला आहे. पालखी दर्शनासाठी मी गेलो होतो. त्यावेळी ⁠पाय चिखलाने माखले होते. ⁠कार्यकर्त्यांनी पाणी आणलं, एक कार्यकर्ता वरून पाणी टाकत होता आणि मी पाय धुवत होतो. पण माझ्यावर विशेष प्रेम का? ⁠अंधारात कोणाचे कोण पाय धुतात हे माहीत आहे. मी तर सर्वांच्या समोर होतो. मी राजा नाही. सोन्याचा चमचा तोंडात घेऊन जन्माला आलो नाही, असं नाना म्हणाले.

काहींचे माझ्यावर जास्त प्रेम आहे पण मला फरक पडत नाही. ⁠हर घर में जल नाही, नल नाही म्हणून कार्यकर्ता पाणी वरतून टाकत होता . ⁠मी चिखलात राहणारा माणूस आहे. ⁠ईडी आणि सीबीआयने कोणाचे किती पाय माखले आहेत आणि कोण कोणाचे पाय पकडत आहे हे माहीत आहे, असं म्हणत नाना पटोलेंनी विरोधकांवर निशाणा साधला.

उज्ज्वल निकम हे लोकसभेसाठी भाजपचे उमेदवार होते हे आपल्या सगळ्यांना माहिती आहे. आता त्यांचीच सरकारी वकील म्हणून निवड करण्यात आली आहे. यावरून भाजपचा कसा दुष्टपणा सुरू आहे हे दिसून येतं. सरकारनं उज्ज्वल निकम यांना सरकारी वकील केलंय. त्यामुळं वकीलही आता भाजपचा राहणार का? भाजपच्या उमेदवाराला सरकारी वकील करता येणार नाही. त्याला आमचा विरोध आहे, असं नाना पटोले म्हणाले.

नाना पटोले यांनी यावेळी नीट परीक्षेबाबतही भाष्य केलं.नीटच्या परीक्षा रद्द कराव्यात. परीक्षेमध्ये किती गोंधळ झालाय. पोलीस भरतीच्या ग्राऊंडवर चिखल झालेला आहे. त्यामुळं उमेदवारांना दुखापत होतेय. पावसाळ्यानंतर शारीरिक चाचणी व्हावी. शेतकऱ्याकडे बियाणं उपलब्ध नाहीये. बोगस बियाणं दिलं जात आहे. आंध्र, गुजरातमधून हा पुरवठा होत आहे, असं पटोले म्हणाले.