कोरोनामुळे(Covid 19) मानवाच्या जीवनमरणाचा प्रश्न निर्माण झाला असला तरी पशुपक्ष्यांवर (animals)त्याचा काहीच परिणाम झालेला नाही. उलट कोरोनाचा संसर्ग रोखण्यासाठी लागू केलेला लॉकडाउन त्यांच्या पथ्यावर पडला आहे. ओसाड रस्ते, ठप्प झालेली वाहनांची वर्दळ व अचानक पसरलेल्या शांततेमुळे घराशेजारी राहणाऱ्या पक्ष्यांचे आवाज स्पष्टपणे ऐकू यायला लागलेत. कधीही न बघितलेले पक्षी अवतीभोवती बिनधास्तपणे फिरत आहेत.सकाळचे उपसंपादक सुनील गावडे यांनी आपल्या कॅमेऱ्यात टिपलेल्या या सुंदर अश्या आपल्या आवती भोवती असणाऱ्या पक्ष्यांविषयी जाणून घेऊया.

(world-environment-day-special-covid-positive-bird-impact-kolhapur-news)

पक्षी हा पर्यावरणातील खूप महत्वाचा घटक आहे. निसर्गाचा समतोल राखण्यात ते सिंहाची भूमिका बजावतात. परंतु, वाढते नागरीकरण, वृक्षतोड, जलप्रदूषण, ध्वनिप्रदूषण, मोबाईल टॉवर, शिकारीचे वाढते प्रमाण, अधिवास नष्ट होणे आदी कारणांमुळे पक्षीजीवन धोक्यात आले आहे. पक्ष्यांच्या अनेक जातीनष्ट झालेल्या आहेत. काही नष्ट होण्याच्या मार्गावर आहेत. आपण वेळीच सावध झालो नाही तर पुढच्या पिढीला चित्रातून पक्ष्यांचे दर्शन होईल. पण, आपण त्यांना जगण्यासाठी आधार देऊ शकतो. परसबागेत पाणपोईची व्यवस्था केली तर पक्ष्यांची तहान भागेल. घरच्या घरी पक्षी निरीक्षणाची संधी मिळेल. विविध पक्षी, त्यांच्या हालचाली, आवाज आदींची माहिती होईल. पाण्यासोबतच शक्य असेल तर अन्नाचीही व्यवस्था आपण करु शकतो. मुख्य म्हणजे प्रत्येकाने एक रोप लावून वाढवले तर स्वतःबरोबरच पक्ष्यांचाही फायदा होईल.

का वाढला किलबिलाट?

मुबलक मिळणारे जलीय अन्न, निर्भय वातावरणामुळे उन्हाळ्यात प्रजनन व वीण करणाऱ्या पक्ष्यांसाठी लॉकडाउनचा हा काळ पोषक व सुरक्षित बनला आहे. रस्त्यावरील मानवी वर्दळ कमी झाली आहे. वाहनांचे आवाजही थांबले. यातून पशुपक्ष्यांमध्ये सुरक्षिततेची भावना निर्माण झाली. त्यांच्या मुक्त वावराचा परीघ आपसूकच वाढला आहे.