यवतमाळ-अमरावती रस्त्यांवर खड्यांमुळे सध्या अपघाताचे प्रमाण वाढले आहे. या अपघातामध्ये पुढील क्रमांक आपला तर नाही ना? अशी भीती येथील विद्यार्थ्यांना सतावत आहे. यासाठीच यवतमाळ-अमरावती जिल्ह्यातील तब्बल आठ हजार विद्यार्थ्यांनी थेट केंद्रीय मंत्री नितीन गडकरी यांना पत्र लिहून पुढचा नंबर आमचा तर नाही ना? अशी विचारणाच केली आहे आणि या रस्त्याच्या दुरावस्थेकडेही लक्ष वेधले आहे.

तीन राज्यांना जोडणाऱ्या यवतमाळ अमरावती मार्गावरील 34 शाळा महाविद्यालयांच्या विद्यार्थ्यांना दररोज जीव मुठीत घेऊन प्रवास करावा लागत आहे. राजकीय पुढाऱ्यांच्या हस्तक्षेपामुळे हा मार्ग पूर्ण होऊ शकला नाही. याआधी काही अपघातात शाळकरी मुलांना आपला जीव गमावावा लागला आहे.

तीन राज्यांना जोडणारा यवतमाळ अमरावती महामार्ग सध्या मृत्यूमार्ग म्हणून ओळखला जात आहे. या मार्गावर असणाऱ्या यवतमाळ आणि अमरावती जिल्ह्यातील तब्बल 34 शाळेतील विद्यार्थ्यांनी आठ हजार विद्यार्थ्यांनी थेट केंद्रीय वाहतूक मंत्री नितीन गडकरींना पत्राद्वारे भावनिक साद घातली आहे.

नितीन गडकरी यांच्या नागपूर येथील सावरकर नगर येथील जनसंपर्क कार्यालयाच्या पत्त्यावर पत्र पाठवण्यात आली आहेत. यामध्ये विद्यार्थ्यांनी खड्डेमय रस्त्यावर दररोज प्रवास करताना होणार त्रास सांगितला आहे. त्यामुळे व्हिजनच्या गोष्टी करणारे गडकरी या मुलांच्या व्यथा ऐकणार हे पाहणेही तितकेच महत्वाचे ठरणार आहे.