सोलापूर : शाळांच्या संचमान्यतेसाठी आता आधारकार्ड असलेले विद्यार्थीच गृहीत धरले जाणार आहेत. जेवढे आधारकार्ड नसतील, तेवढे शिक्षक अतिरिक्त होणार आहेत. या पार्श्वभूमीवर जिल्ह्यातील शाळा-महाविद्यालयांना (पहिली ते बारावी) १५ दिवसांत तब्बल १५ हजार १६९ विद्यार्थ्यांचे आधारकार्ड काढून घ्यावे लागणार आहे. नाहीतर जिल्ह्यातील ५०५ शिक्षक अतिरिक्त होऊ शकतात, असा इशारा प्राथमिक शिक्षण विभागाने दिला आहे.

जिल्ह्यात जिल्हा परिषदेच्या दोन हजार ७९५ शाळा असून माध्यमिकच्या एक हजार ६३ शाळा आहेत. खासगी प्राथमिकच्या देखील काही शाळा आहेत. या शाळांमध्ये साडेपाच लाखांवर विद्यार्थी आहेत. परंतु, आता २०२२-२३ या शैक्षणिक वर्षातील संचमान्यतेसाठी प्रत्येक विद्यार्थ्याचे आधार नोंदणी बंधनकारक आहे. चिंतेची बाब म्हणजे जिल्ह्यातील दीड लाख विद्यार्थ्यांच्या ‘आधार’मध्ये त्रुटी आहेत. त्यातील १५ हजार १६९ विद्यार्थ्यांचे आधारकार्डच नाही.

दुसरीकडे सव्वालाख विद्यार्थ्यांच्या आधारकार्डमध्ये लिंग, नाव, जन्मतारीखेत त्रुटी आहेत. ३० एप्रिलपर्यंत आधारकार्ड देखील काढून घ्यावे लागणार आहे आणि त्रुटींची पूर्तता देखील करून घ्यावी लागणार आहे. मे महिन्यात सर्वच शाळांची संचमान्यता होणार आहे. त्यावेळी जेवढे आधारकार्ड नसलेले विद्यार्थी असतील, ते ग्राह्य धरले जाणार नाही. त्यामुळे तेवढे शिक्षक अतिरिक्त होणार आहेत.

मुलांची ‘आधार’ची स्थिती (इयत्ता १ ते १२)

• एका शिक्षकासाठी विद्यार्थी

• ३०

• मुलांचे ‘आधार’च नाही

• १५,१६९

• ‘अतिरिक्त’ची भीती

• ५०५

• आधार प्रमाणीकरणाची मुदत

• ३० एप्रिल

नऊ हजारांवर विद्यार्थ्यांचे लिंग, जन्मतारीख चुकली

जिल्हा परिषदेच्या दोन हजार ७९५ शाळांमधील सहा हजार १४७ विद्यार्थ्यांकडे अजूनही आधारकार्डच नाही. तर ३० हजार विद्यार्थ्यांच्या आधारमध्ये त्रुटी आहेत. त्यात नाव, जन्मतारीख, लिंग, जन्मतारीख व लिंग, नाव व जन्मतारीख आणि नाव व लिंगात बदल झालेला आहे. खासगी प्राथमिक शाळांमधील (पहिली ते आठवी) सहा हजार ४३२ विद्यार्थ्यांचे आधारकार्ड शाळांमध्ये नोंदवलेलेच नाही. तर नववी ते बारावीच्या वर्गातील दोन हजार ५९० विद्यार्थी आधाराविनाच आहेत. ३० एप्रिलपर्यंत त्या प्रत्येक विद्यार्थ्यांचे आधारकार्ड काढून त्याची ‘सरल’ पोर्टलवर नोंदणी करणे बंधनकारक आहे.

संचमान्येपूर्वी आधार बंधनकारकच

झेडपी शाळांबरोबरच खासगी प्राथमिक व माध्यमिक शाळा-महाविद्यालयांमधील एकूण १५ हजार विद्यार्थ्यांचे आधारकार्ड नोंदवलेले नाही. दुसरीकडे मिसमॅच असलेले देखील विद्यार्थी लाखांवर आहेत. दोन्हीची पूर्तता ३० एप्रिलपर्यंत करावे लागणार आहे. सीईओ दिलीप स्वामी यांनी मुख्याध्यापकांना त्यासंदर्भात वेळावेळी मार्गदर्शन केले आहे. पंचायत समित्यांसह महिला व बालकल्याण विभागाकडील आधार केंद्रांवरून शाळांनी आधारकार्ड काढणे व त्रुटींची दुरुस्ती करून घ्यावी.

- संजय जावीर, प्राथमिक शिक्षणाधिकारी, सोलापूर जिल्हा परिषद