टेलिव्हिजनवरील काही मालिकांना अल्पावधीतच प्रेक्षकांकडून भरभरून प्रेम मिळतं. स्टार प्रवाह वाहिनीवरील 'आई कुठे काय करते' Aai Kuthe Kay Karte ही त्यापैकीच एक मालिका आहे. या मालिकेतील प्रत्येक कलाकाराने प्रेक्षकांच्या मनावर छाप सोडली आहे. मालिकेच्या प्रत्येक भागात येणारं नवीन, रंजक वळण आणि कलाकारांचं दमदार अभिनय हे यशामागचा कारण आहे. सध्या या मालिकेचं कथानक अत्यंत रंजक वळणावर येऊन पोहोचलं आहे. अरुंधतीच्या आयुष्यात एका नव्या व्यक्तीची एण्ट्री होणार आहे. या नव्या व्यक्तीची भूमिका कोण साकारणार, याबद्दलची उत्सुकता आहे.

एकीकडे मालिकेत यशची भूमिका साकारणारा अभिनेता अभिषेक देशमुख याने काही काळासाठी ब्रेक घेतला आहे. दुसरीकडे अविनाशची आर्थिक मदत करण्यासाठी अरुंधतीने महत्त्वाचं पाऊल उचललं आहे. अविनाशला मदत करताना अरुंधती मोठ्या अडचणीत सापडली आहे. अशा रंजक वळणावर मालिकेत एका खास व्यक्तीची एण्ट्री होणार आहे. अरुंधतीचा एक जुना मित्र तिच्या आयुष्यात परत येणार आहे. या मित्राची भूमिका अभिनेते समीर धर्माधिकारी साकारणार असल्याच्या जोरदार चर्चा आहेत. अरुंधतीचा हा मित्र तिला तिच्या अडचणीत मदत करणार का, त्याच्या येण्याने अरुंधतीच्या आयुष्यात कोणतं नवीन वादळ येणार हे प्रेक्षकांना मालिकेच्या आगामी भागात पाहायला मिळेल.

'आई कुठे काय करते' या मालिकेत अभिनेत्री मधुराणी गोखले प्रभुलकर ही अरुंधतीची भूमिका साकारत आहे. तर मिलिंद गवळी अनिरुद्धच्या भूमिकेत आहेत. मालिकेत संजनाची नकारात्मक छटा असलेली भूमिका अभिनेत्री रुपाली भोसले साकारत आहे.