'बिग बॉस मराठी' सिझन १ फेम अभिनेता आस्ताद काळे आणि स्वप्नाली पाटील लवकरच लग्नबंधनात अडकणार आहेत. या दोघांच्या लग्नापूर्वीच्या कार्यक्रमांना सुरुवात झाली आहे. लग्नाच्या तयारीची खरी सुरुवात ही केळवणापासूनच होते. स्वप्नालीच्या जिवलग मैत्रिणींनी केळवणासाठी या दोघांना घरी बोलावलं आणि त्यांचा पाहुणाचार केला. 

हर्षदा खानविलकर आणि शर्मिला शिंदे यांनी आस्ताद-स्वप्नालीचं केळवण केलं. लग्नाआधी वधू-वरांसाठी केलं जाणारं केळवण हे तर सगळ्यांनी एकत्र भेटण्याचं निमित्त असतं. वधू-वरांच्या आवडीचे पदार्थ करून जेवणासाठी पाहुण्यांकडे आमंत्रित केलं जातं. त्यानंतर एखादी भेटवस्तू देऊन लग्नाबाबत शुभेच्छा दिल्या जातात. शर्मिलाने सोशल मीडियावर फोटो पोस्ट करत या दोघांना आयुष्याच्या नव्या सुरुवातीसाठी शुभेच्छा दिल्या आहेत. 

आस्ताद आणि स्वप्नाली गेल्या काही वर्षांपासून एकमेकांना डेट करत आहेत. आस्ताद सध्या 'चंद्र आहे साक्षीला' या मालिकेत महत्त्वाची भूमिका साकारतोय. यामध्ये सुबोध भावे आणि ऋतुजा बागवे प्रमुख भूमिकेत आहेत. तर स्वप्नाली 'स्वराज्यजननी जिजामाता' या मालिकेत महत्त्वपूर्ण भूमिका साकारतेय.