बॉलिवूड अभिनेत्री अनुष्का शर्माने विक्रीकर विभागाच्या नोटीसला आव्हान देणारी याचिका मुंबई उच्च न्यायालयात दाखल केली आहे. 2012-13 आणि 2013-14 मध्ये सेल टॅक्स विभागाने अभिनेत्रीला नोटीस बजावली होती. आणि मीडिया रिपोर्ट्सनुसार, अनुष्काने तिच्या टॅक्स कन्सल्टंटच्या मदतीने गेल्या महिन्यात 2 याचिका दाखल केल्या होत्या.

अनुष्काने विक्रीकर विभागाने दिलेले आदेश रद्द करण्याची विनंती न्यायालयाला केली आहे. डिसेंबर 2022 मध्ये विक्रीकर विभागाच्या आदेशाला आव्हान देणारी कर सल्लागार श्रीकांत वेळेकर यांची याचिका उच्च न्यायालयाने स्वीकारण्यास नकार दिल्यानंतर अभिनेत्रीने गेल्या आठवड्यात याचिका दाखल केली.

या प्रकरणाबाबत ट्विट करताना एएनआयने लिहिले की, “मुंबई उच्च न्यायालयाने अनुष्का शर्माच्या याचिकेवर सुनावणी करण्यास सहमती दर्शवली आहे. सेल टॅक्स विभागाच्या कारवाईला त्यांनी याचिकेद्वारे आव्हान दिले आहे. यासोबतच अभिनेत्रीच्या याचिकेबाबत न्यायालयाने प्रतिवादींना नोटीस पाठवली आहे. त्यानंतर 6 फेब्रुवारीला या प्रकरणाची सुनावणी होणार आहे. यासोबतच उच्च न्यायालयाने विक्रीकर विभागाला या याचिकेवर 3 आठवड्यांत उत्तर देण्यास सांगितले आहे.

याआधी, काही वृत्तानुसार, न्यायालयाने अनुष्का शर्माला मागील सुनावणीत फटकारले होते. तसेच, कोर्टाने म्हटले होते की कर सल्लागाराद्वारे याचिका दाखल करण्याचे प्रकरण त्यांनी कधीही ऐकले नाही किंवा पाहिले नाही. कोर्टाने अनुष्का शर्माच्या वकिलाला विचारले की अभिनेत्री स्वतः ही याचिका का दाखल करू शकत नाही.