प्रसिद्ध अभिनेते प्रकाश राज हे त्यांच्या परखड वक्तव्यांसाठी नेहमीच चर्चेत असतात. समाजातील वेगवेगळ्या घडामोडी असो किंवा राजकारणातील काही विषय प्रकाश हे तितक्याच पोटतिडकीनं भूमिका घेत ठामपणे बोलत असतात.

आपल्या भूमिकेवर ठाम राहून नेहमीच समाजातील वेगवेगळ्या गोष्टींवर आक्रमकपणे भूमिका मांडणाऱ्या प्रकाश राज यांचा चाहतावर्ग देखील तितकाच मोठा आहे. ते सोशल मीडियावर कायम सक्रिय असतात. त्यांना खटकणाऱ्या गोष्टी पोस्ट करत त्यावर सडेतोड भाष्य करत असतात.

काही दिवसांपुर्वी त्यांनी चांद्रयान 3 वर केलेलं ते वक्तव्य वादाच्या भोवऱ्यात सापडले होते. आता त्यातच त्यांनी पुन्हा एकदा पंतप्रधान नरेंद्र मोदी यांच्यावर टीका केली आहे.

संसदेच्या विशेष अधिवेशनाला सोमवारपासून सुरुवात झाली आहे. संसदेच्या नवीन इमारतीमध्ये हे अधिवेशन संपन्न झाले. पंतप्रधान नरेंद्र मोदी यांच्या उपस्थितीत हा सोहळा पार पडला. संसदेच्या विशेष अधिवेशनात महिला आरक्षण विधेयक मांडण्यात आले होते.

याचीच सर्वत्र चर्चा आहे. त्यातच आता प्रकाश राज यांनी ट्विटवर एक फोटो पोस्ट केला जो पंतप्रधान नरेंद्र मोदी यांचा आहे. या फोटोसोबत त्यांनी कॅप्शनमध्ये असे काही लिहिले की त्याची सर्वत्र चर्चा तर झालीच मात्र प्रकाश राज यांच्यावर टीकाही केली आहे.

या फोटोत नरेंद्र मोदी हे एक रिकाम्या फोल्डरसोबत दिसताय आणि त्याचा एक हात हा त्यांच्या खिशात आहे.

नरेंद्र मोदींचा फोटो ट्विट करत प्रकाश राज लिहितात की, "2014 पासून नेहमी पडणारे कोडे, नेमकं काय रिकामं आहे हे मला सांगा.. ते घेऊन जात असलेला फोल्डर... त्यांच्या जॅकेटचा खिसा की त्यांचं डोकं.."

हे ट्विट शेयर करत आता नेमकं प्रकाश राज यांना काय बोलायचं आहे आणि त्यांनी नरेंद्र मोदींची पुन्हा खिल्ली उडवली आहे अशी चर्चा सोशल मीडियावर रंगली आहे. आता हे ट्विट चर्चेत आलं आहे. नेटकरीही यावर प्रतिक्रिया देत आहे.