मुंबई - सलमान आता एका मुव्हीसाठी किती कोटी पैसे घेतो याचा आकडा त्याच्या चाहत्यांना सांगण्याची गरज नाही. तो आता थेट टक्केवारीत बोलतो. त्याचा कोणताही चित्रपट 100 कोटींच्या पुढे सहज जातो म्हणून भागीदारीत पैसे घेतो. त्याच्यासारखे अनेक कलाकार बॉलीवूडमध्ये आहेत जे जितका नफा तेवढे मानधन अशा हिशोबात पैसे घेताना दिसतात. मात्र एकेकाळी सलमानला त्याच्या पहिल्या चित्रपटासाठी मिळालेलं मानधनाचा आकडा जर तुम्ही ऐकलात तर तुम्हाला खरं वाटणार नाही. याशिवाय त्याला ज्या जाहिरात कंपन्यांनी करारबध्द  करुन घेतले होते त्यांच्याकडून मिळणारे मानधनही फार नव्हते.

सलमान दोन ते तीन वर्षांपूर्वी फोब्सच्या यादीत असणारा भारतीय अभिनेता होता. 100 ते 200 कोटींचे मानधन घेणारा अभिनेता म्हणूनही त्याची चर्चा होती. आज भारतीय चित्रपट सृष्टीत सर्वाधिक श्रीमंत अभिनेता म्हणून भाईजानच्या नावाचा उल्लेख होतो. त्याच्या दिलदारीचा प्रत्ययही अनेकांनी घेतला आहे. सध्या तो भारतातील प्रसिध्द अशा एका रियॅलिटी शो चा होस्ट म्हणून दिसतो. एका मुलाखतीच्या दरम्यान सलमानने आपल्या जून्या आठवणींना उजाळा दिला होता. 2013 मध्ये झालेल्या बिग बॉसच्या प्रत्येक शो साठी त्यानं 6.5 कोटी रुपये घेतले होते. त्यानंतर त्याचे मानधन वाढत गेले. मात्र हे झाले आताचे, ज्यावेळी सलमाननं त्याचा पहिला मुव्ही साईन केला त्यावेळी त्याला मिळालेलं मानधन होत 75 रुपये.

आता सलमान एंटरटेनमेंट इंडस्ट्रीमध्ये सर्वाधिक मानधन घेणारा अभिनेता म्हणून प्रसिध्द आहे. सलमाननं 1989 मध्ये वा बेवी हो तो ऐसी च्या माध्यमातून चित्रपटसृष्टीत पदार्पण केले असले तरी त्याचा मुख्य कलाकार म्हणून पहिला चित्रपट मैंने प्यार किया हा होता. त्यावेळी सलमानला त्या चित्रपटासाठी 75 रुपयांचा चेक मिळाला होता. काही वर्षांपूर्वी पीटीआयला दिलेल्या मुलाखतीत त्यानं ही गोष्ट सांगितली होती. सलमान म्हणाला, मी ताज हॉटेलमध्ये डान्स केला होता. त्यावेळी तिथे माझा एक मित्र डान्स करायचा. एक गंमत म्हणून तो मला तिथे घेऊन गेला होता.