Sayaji Shinde News: मराठी असून आणि मराठीपण जपून दाक्षिणात्य मनोरंजन विश्वात आपल्या दमदार अभिनयाने दबदबा निर्माण करणारे अभिनेते म्हणजे सयाजी शिंदे. त्यांनी केवळ दाक्षिणात्यच नाही तर हिंदी,मराठी मनोरंजन विश्वालाही आपल्या अभिनयाने अवाक केले.

सयाजी शिंदेंनी जेवढी विलनची दमदार भूमिका केली तेवढीच ताकदीची भूमिका त्यांनी एका सभ्य माणसाचीही साकारली. सयाजी शिंदे आज प्रसिद्ध अभिनेते असले तरी त्यांची दुसरी बाजू अशी आहे की कौतुक करताना शब्द कमी पडतील.

सयाजी शिंदे हे कामा व्यतिरिक्त पूर्णवेळ समाजसेवेत असतात. ग्रामीण भागातील प्रश्न, पाणी समस्या आणि जंगल संवर्धनासाठी ते काम करत आहेत. वृक्ष वाचवण्यासाठी त्यांनी जवळपास संपूर्ण महाराष्ट्र पालथा घातला आहे. पण याच कामा दरम्यान त्यांना एक दुखापत झाली आहे.

पुणे-बंगलोर महामार्गावर एका ठिकाणी झाडांचं पुनर्रोपण करत असताना सयाजी शिंदे यांच्यावर मधमाशांचा हल्ला झाला आहे.  

झाडांचे पुनर्रोपण करताना ही घटना घडल्याची माहिती समोर येत आहे. पुणे- बंगळूर महामार्गाचे रुंदीकरण सुरू आहे. तेथील झाडांसाठी ते तासवडे येथे हजर होते. कत्तल करुन जी झाडे वाचली आहेत, त्या झाडांची शास्त्रीय पद्धतीने काटछाट करुन त्याचे पुनर्रोपण केलं पाहिजे, अशी भूमिका सयाजी शिंदे यांनी घेतली आहे. पण याच दरम्यान त्यांच्यावर हा हल्ला झाल्याचे समजले आहे.