Saira Bano Meets PM Modi: दिवंगत प्रसिद्ध अभिनेते दिलीप कुमार यांच्या पत्नी सायरा बानो या 1960 च्या दशकातील सर्वात यशस्वी अभिनेत्रींपैकी एक होत्या. मनोरंजन विश्वातील सर्वात लोकप्रिय कलाकारांमध्ये त्यांच्या नावाचा सामावेश आहे. 1961 मध्‍ये कल्‍ट क्‍लासिक 'जंगली'मधून सायरा बानो यांनी करिअरची सुरूवात केली. त्यानंतर अल्पावधित त्या यशाच्या शिखरावर पोहचल्या.

ज्येष्ठ अभिनेत्री सायरा बानो यांनी शुक्रवारी पंतप्रधान नरेंद्र मोदी यांची भेट घेतली. यावेळी सायरा बानो यांनी मोदींसोबत चर्चाही केली. पंतप्रधान नरेंद्र मोदी यांनी त्यांच्या भेटीचे काही फोटो सोशल मिडियावर शेयर केले आहेत. यासोबत त्यांनी या भेटीबद्दलही सांगितलं आहे.

सोशल मीडिया प्लॅटफॉर्म 'X' वर पोस्टमध्ये शेयर करत लिहिले की, "सायरा बानो जी यांना भेटून खूप आनंद झाला. चित्रपटसृष्टीत त्यांच्या उत्कृष्ट कामाचे पिढ्यानपिढ्या कौतुक होत आहे. विविध विषयांवर आमची छान चर्चा झाली. सध्या हे फोटो सोशल मिडियावर व्हायरल होत आहे.

सायरा बानो यांच्या अभिनय कारकिर्दीबद्दल बोलायचं झालं तर त्या 1960 च्या दशकातील सर्वात यशस्वी अभिनेत्रींपैकी एक होत्या. 'पडोसन', 'शादी', 'बैराग', 'जमीर', 'गोपी', 'आयी मिलन की बेला', 'दुनिया', 'हेरा फेरी', 'झुक गया आसमान', 'शादी'पासून 'जंगल' यांसारख्या अनेक हिट चित्रपटात बानो यांनी काम केले.

तर दुसरीकडे पंतप्रधान मोदी यांची मनोरंजन विश्वात चर्चा आहे. त्यांनी लिहीलेल्या 'अबंडन्स इन मिलेट्स' या गाण्याला ग्रॅमी अवॉर्ड्स 2024 च्या सर्वोत्कृष्ट ग्लोबल म्युझिक परफॉर्मन्स श्रेणीमध्ये नामांकन मिळाले आहे. शुक्रवारी आलेल्या ग्रॅमी अवॉर्ड्स 2024 च्या यादीत 'अबंडन्स इन मिलेट्स'ला नामांकन मिळाल्याची आनंदाची बातमी सर्वांना मिळाली.