गायक आणि प्रसिद्ध टेलिव्हिजन सूत्रसंचालक आदित्य नारायण (Aditya Narayan) लवकरच बाबा होणार आहे. आदित्यची पत्नी श्वेता अग्रवाल (Shweta Agarwal) गरोदर असून नुकतंच या दोघांनी सोशल मीडियावरील पोस्टद्वारे चाहत्यांना गोड बातमी दिली. आदित्यने मॅटनिर्टी शूटचा फोटो इन्स्टाग्रामवर पोस्ट केला आहे. 'लवकरच आमच्या आयुष्यात चिमुकल्या पाहुण्याचं आगमन होणार आहे. श्वेता आणि मी अत्यंत कृतज्ञ आणि आनंदी आहोत', असं आदित्यने लिहिलं. आदित्यच्या या पोस्टवर अनेकांनी लाइक्स, कमेंट्सचा वर्षाव करत दोघांना शुभेच्छा दिल्या आहेत. (Aditya Narayan Shares News of Shweta Agarwal's Pregnancy)

श्वेताने नुकताच तिचा वाढदिवस साजरा केला. या वाढदिवसाच्या एका दिवसानंतरच आदित्यने चाहत्यांना ही आनंदाची बातमी सांगितली. २०२२ मध्ये टेलिव्हिजनमधून ब्रेक घेईन तेव्हा मी बाबा होण्याचा विचार करेन, असं आदित्यने गेल्या वर्षी एका मुलाखतीत सांगितलं होतं.

आदित्य आणि श्वेता हे एकमेकांना 10 वर्षांपासून डेट करत होते. त्यानंतर 1 डिसेंबर 2020 रोजी त्यांनी लग्न केलं. त्यात केवळ दोघांच्या परिवारातील आणि जवळचे नातेवाईक, मित्रपरिवार सहभागी झाले होते. आदित्य आणि श्वेताची ओळख ही शापित चित्रपटाच्या सेटवर झाली होती. शापित हा आदित्यचा पहिलाच चित्रपट होता. याच चित्रपटाच्या शूटिंगदरम्यान दोघं एकमेकांच्या प्रेमात पडले.