vishakha subhedar: गेली कित्येक वर्ष 'फू बाई फू', 'हास्य जत्रा' अशा कार्यक्रमातून तर नाटक आणि चित्रपटातून आपलं मनोरंजन करणारी, आपल्याला हसवणारी अभिनेत्री म्हणजे विशाखा सुभेदार. विशाखा आणि विनोद हे समिरकरण प्रेक्षकांच्या मनावर कायमच रुंजी घालते.

काही महिन्यांपूर्वीच विशाखाने 'महाराष्ट्राची हास्यजत्रा' या कार्यक्रमाला रामराम करून एका नव्या प्रवासाला सुरुवात केली. सध्या ती 'स्टार प्रवाह' वरील 'शुभविवाह' या मालिकेत आत्याबाईच्या भूमिकेत दिसत आहे. पण प्रेक्षक मात्र विशाखाला अजूनही हास्यजत्रेत पाहण्यासाठी आतुर आहेत.

नुकताच विशाखाने एक व्हिडिओ शेयर केला, जो पाहून विशाखा हास्यजत्रेत परतली की काय असा प्रश्न चाहत्यांना पडला आहे.

विशाखा सुभेदार सोशल मीडियावर बरीच सक्रिय असते. इन्स्टाग्रामवर तिच्या बऱ्याच रील्स व्हायरल होत असतात. आयुष्यातील अनेक सुख-दुख, प्रसंग ती शेयर करत असते. आज असाच एक व्हिडिओ तिने पोस्ट केला आहे. जो पाहून, चर्चेला उधाण आले आहे.

या व्हिडिओ मध्ये विशाखा शॉर्ट केस आणि काहीशा वेगळ्या भूमिकेत दिसत आहे. जणू हे हास्य जत्रेतील स्किटच आहे. सोबत विशाखा एक डायलॉग घेऊन म्हणते, ''मोका सबको मिलता है..'' त्यामुळे हा व्हिडिओ आता चर्चेचा विषय झाला आहे.

विशाखा तु हास्यजत्रेत पुन्हा परतलीस का?, असा प्रश्न तिला अनेकांनी विचारला आहे. एवढेच नाही तर एका चाहतीने थेटच विचारले की तू 'हास्यजत्रेत कधी परतणार?' त्यावर विशाखाने उत्तर दिले, 'नाही, आता वेगळा प्रोजेक्ट हातात आहे. तुम्ही माझी नवी मालिका पहा. ”

सोबतच चाहत्यांनी आम्ही तुला खूप मिस करत आहोत, अजूनही तु दिसशील या आशेने हास्यजत्रा पाहतो, तुझ्या सारखं बाबू कुणीच बोलू शकत नाही, अशा कमेंट चाहत्यांनी दिल्या आहेत.