गेल्या वर्षी नोव्हेंबर महिन्यात अभिनेता अक्षय कुमार आणि कियारा अडवाणी यांच्या मुख्य भूमिका असलेला 'लक्ष्मी' हा चित्रपट ओटीटी प्लॅटफॉर्मवर प्रदर्शित झाला. त्यानंतर आता २१ मार्च रोजी रात्री ८ वाजता स्टार गोल्ड वाहिनीवर या चित्रपटाचा वर्ल्ड टेलिव्हिजन प्रिमिअर पार पडला. यादिवशी चित्रपटाने टेलिव्हिजनवर विक्रम रचला आहे. देशभरात या चित्रपटाला तब्बल ६३ दशलक्ष व्ह्यूअर्स मिळाले आहेत. 'लक्ष्मी'ने गेल्या पाच वर्षांतील रेकॉर्ड मोडला असून गेल्या पाच वर्षांत टीव्हीवर सर्वाधिक व्ह्यूज मिळालेला चित्रपट बनला आहे. तर गेल्या वर्षभरात टॉप १० वर्ल्ड टेलिव्हिजन प्रिमिअरपैकी ९  हे स्टार गोल्ड वाहिनीने दिले आहेत. 

'लक्ष्मी' हा 'कंचना' या तामिळ चित्रपटाचा हिंदी रिमेक आहे. तामिळ चित्रपटाचा दिग्दर्शक राघव लॉरेन्सनंच या हिंदी चित्रपटाचं दिग्दर्शन केलंय. विशेष म्हणजे हा चित्रपट जेव्हा ओटीटी प्लॅटफॉर्मवर प्रदर्शित झाला, तेव्हा त्याला प्रेक्षक-समिक्षकांकडून फारसा प्रतिसाद मिळाला नव्हता. लक्ष्मी हा चित्रपट म्हणजे अक्षय कुमारचा फुसका बार अशाही शब्दांत टिप्पणी झाली होती. मात्र चित्रपटातील शरद केळकरच्या भूमिकेला प्रेक्षकांकडून भरभरून प्रेम मिळालं होतं. 

हेही वाचा : 'अत्यंत घाण भाषेत आम्ही कलाकारसुद्धा उत्तर देऊ शकतो', शशांक ट्रोलरवर भडकला

शरद केळकरने या चित्रपटात एका ट्रान्सजेंडरची भूमिका साकारली होती. "लक्ष्मीची भूमिका साकारणं खूपच आव्हानात्मक होतं. या भूमिकेला प्रेक्षकांकडून जे प्रेम मिळालं, ते मी कधीच विसरू शकत नाही", अशी प्रतिक्रिया शरद केळकरने दिली. चित्रपटात लक्ष्मी ट्रान्सजेंडरची काल्पनिक कथा दाखविण्यात आली आहे. एका व्यक्तीला (अक्षय कुमारला) लक्ष्मी हा ट्रान्सजेंडर झपाटतो आणि पुढे चित्रपटात अनेक रंजक गोष्टी घडतात. अक्षय, कियारा आणि शरदसोबतच यामध्ये आएशा रझा मिश्रा, तरुण अरोरा, अश्विनी काळसेकर, मनु ऋषी चड्ढा आणि राजेश शर्मा यांच्याही महत्त्वपूर्ण भूमिका आहेत.