Animal Actor Bobby Deol : संदीप रेड्डी वांगाच्या अॅनिमलमधून प्रचंड लोकप्रिय झालेल्या बॉबीवर प्रेक्षकांनी कौतुकाचा वर्षाव केला आहे. करिअरच्या वेगळ्या टप्प्यावर असलेल्या बॉबीच्या वाट्याला आलेली लोकप्रियता ही सध्या चर्चेचा विषय आहे. त्यानं याविषयी विविध मुलाखतींमधून सांगितलेली गोष्ट चाहत्यांचे लक्ष वेधून घेताना दिसत आहे.

बॉबीनं अॅनिमलमध्ये साकारलेली खलनायकाची भूमिका ही चाहत्यांचे, नेटकऱ्यांचे आणि समीक्षकांचे लक्ष वेधून घेत आहे. त्याला कारणही तसेच आहे. बॉबीनं केलेला अभिनय. यापूर्वी प्रसिद्ध दिग्दर्शक प्रकाश झा यांच्या आश्रम नावाच्या वेबसीरिजमध्ये बॉबीनं साकारलेली बाबाजींची भूमिका प्रेक्षकांना कमालीची आवडली होती. त्याला प्रेक्षकांचा तुफान प्रतिसाद मिळाला होता.

सोशल मीडियावर अॅनिमलच्या निमित्तानं बॉबीचे जे व्हिडिओ व्हायरल होत आहे त्यात त्यानं चाहत्यांना धन्यवाद दिले आहे. माझ्यावर प्रेक्षकांचे, चाहत्यांचे जे प्रेम आहे ते पाहून आपण थक्क झालो. अशा प्रकारे जर तुमच्या भूमिकेचे ते कौतुक करत असतील तर आणखी काय हवं असतं एखाद्या कलाकाराला....अशी पोस्ट बॉबीनं केली होती. अबरारच्या भूमिकेला प्रेक्षकांनी दिलेला प्रतिसाद पाहून तो कमालीचा भावूक झाला होता.

आता एका मुलाखतीतून बॉबीनं त्याच्या करिअरमधील काही महत्वाच्या गोष्टींचा खुलासा केला आहे. त्यात त्यानं आश्रम वेबसीरिजविषयी एक किस्सा सांगितला आहे जो सध्या सोशल मीडियावरुन चर्चेत आला आहे. बॉबी म्हणतो की, मी आश्रम नावाच्या मालिकेमध्ये जी भूमिका साकारली त्याविषयी माझ्या कुटूंबियांना काहीही माहिती नव्हते. त्यांना न सांगता मी त्यामध्ये काम केले होते.

तुम्हाला खोटं वाटेल पण मी या मालिकेच्या शुटींगला घरी कुणालाही न सांगता जात होतो. त्याचे कारण माझ्या मनात असलेली भीती. ही मालिका प्रदर्शित झाल्यानंतर देखील मी खूप घाबरुन गेलो होतो. मला घरचे काय म्हणतील याचा विचार करायचो. अशा शब्दांत बॉबीनं त्याच्या भावना व्यक्त केल्या आहेत.

रणबीर आणि बॉबीच्या अॅनिमलच्या कलेक्शनविषयी सांगायचे झाल्यास त्यानं आतापर्यत तीनशे कोटींपेक्षा जास्त कमाई केली आहे. रणबीरनं तर त्याच्या ब्रम्हास्त्रचा रेकॉर्ड ब्रेक केल्याचे सांगितले जात आहे. वर्ल्ड वाईड अॅनिमलच्या कलेक्शनविषयी सांगायचे झाल्यास त्यानं सहा दिवसांत पाचशे कोटींची कमाई केली आहे.